ԵՐԵՎԱՆ, 29 հունիսի — Sputnik. Եթե որևէ կազմակերպություն ուզում է իր արտադրանքն արտահանել ԵՄ և օգտվել GSP+-ի արտոնություններից, պետք է կարողանա ապացուցել, որ արտահանվող ապրանքը հենց հայկական ծագում ունի։ Sputnik Արմենիայի հետ զրույցում, մեկնաբանելով հայկական ծագման ապրանքների արտոնյալ առևտրի հնարավորություն ընձեռող Եվրոպական «Ռեքս» համակարգի պայմանները, ասաց Տնտեսական զարգացման և ներդրումների փոխնախարար Գարեգին Մելքոնյանը։
««Ռեքս» համակարգը Եվրամիությունը նոր է ներդրել։ Դրանով ԵՄ–ն գործարարին ինքնահայտարարագրվելու հնարավորություն է ընձեռում։ Մեկ անգամ գրանցվելով` գործարարը մեկընդմիշտ ազատվում է հավելյալ սերտիֆիկացման գործընթացից»,– նշեց փոխնախարարը։
Նա հիշեցրեց, որ այժմ Հայաստանում արտադրված ապրանքը ԵՄ տարածք արտահանելու համար կազմակերպությունները ստիպված են լինում ամեն խմբաքանակի համար առանձին դիմել և համապատասխան վճարի դիմաց ստանալ ծագման սերտիֆիկատ։
«Այս համակարգը նոր հնարավորություն է տալիս։ Եթե դու գրանցվում ես այդ համակարգում մեկ անգամ, ապա մինչև 6000 եվրո արժեքով յուրաքանչյուր խմբաքանակ արտահանելիս այլևս պետք չի լինի ծագման սերտիֆիկատ ստանալ»,– ասաց փոխնախարարը` հավելելով, որ այդպիսով կնվազի թղթատարությունը, կխնայվի գործարարների ժամանակն ու գումարը։
Համակարգը Հայաստանի համար հասանելի կլինի 2018 թ. հունվարի 1-ից, երբ Հայաստանը պաշտոնապես կմիանա Եվրոպական «Ռեքս» (Registered Exporter System- REX) համակարգին։
Համակարգի մասին ֆեյսբուքյան իր էջում օրերս գրառում էր արել ՀՀ վարչապետ Կարեն Կարապետյանը:
«Արտադրված է Հայաստանում» պիտակով սնունդ, խմիչք, ձկնամթերք, տեքստիլ ու լեռնամետալուրգիական ապրանք Եվրոպա արտահանելու համար կարիք չի լինի ներկայացնել ծագման սերտիֆիկատ»,- գրել էր վարչապետը։
