ԵՐԵՎԱՆ, 8 դեկտեմբերի — Sputnik, Խաչիկ Չախոյան. Հայաստանի Հանրապետության սպորտի և երիտասարդության հարցերի նախարարությունն ու Հայաստանի ազգային օլիմպիական կոմիտեն իրենց զորակցությունն են հայտնել Ռուսաստանի Դաշնության օլիմպիական կոմիտեին և համատեղ հայտարարություն են տարածել:
Հայաստանի Հանրապետության սպորտի և երիտասարդության հարցերի նախարարությունն ու Հայաստանի ազգային օլիմպիական կոմիտեն պատրաստ են կազմակերպչական բոլոր հարցերում աջակցել ռուսաստանցի մարզիկներին, քանի որ ՄՕԿ-ի որոշմամբ իր գործունեությունը ժամանակավորապես դադարեցրած ՌԴ ազգային օլիմպիական կոմիտեն չի կարող ապահովել ՄՕԿ-ի կողմից ձմեռային օլիմպիական խաղերին մասնակցելու թույլտվություն ստացած մարզիկների մասնակցությունը Փհենչհանում կայանալիք օլիմպիական խաղերին։
«Ոչ բարեխիղճ մարզիկների պատճառով անարդարացի կլինի պատժել արգելված նյութեր չօգտագործած մարզիկներին, որոնց մասնակցությունը 2018 թվականի ձմեռային օլիմպիական խաղերին Միջազգային օլիմպիական կոմիտեի կողմից արգելված չէ»,- նշված է համատեղ հայտարարության մեջ։
Հայաստանը համարում է, որ արդարացի կլինի արգելված նյութեր չօգտագործած մարզիկներին հնարավորություն տալ հանդես գալու իրենց երկրի դրոշի ներքո և հաղթանակի դեպքում, ի պատիվ այդ մարզիկների, հնչեցնել այն երկրի օրհներգը, որը նրանք ներկայացնում են։
Միջազգային Օլիմպիական կոմիտեն դեկտեմբերի 5-ին որոշում կայացրեց զրկել Ռուսաստանի օլիմպիական հավաքականին 2018 թվականին Փհենչանում կայանալիք ձմեռային օլիմպիական խաղերի մասնակցությունից: Միաժամանակ Ռուսաստանը ներկայացնող այն մարզիկները, որոնք չեն օգտագործել դոպինգ կարող են հանդես գալ օլիմպիական խաղերում չեզոք դրոշի ներքո և նրանց հաղթանակի դեպքում կբարձրացվի Օլիմպիական խաղերի դրոշն ու կհնչի Օլիմպիական օրհներգը:
Այս որոշումը, իհարկե, ծանր հարված էր ռուսական սպորտին, բայց Ռուսաստանի նախագահ Վլադիմիր Պուտինը հայտարարեց, որ Ռուսաստանը չի բոյկոտելու օլիմպիական խաղերը, և այն մարզիկները որոնք կցանկանան մասնակցել մրցումներին, աջակցություն կստանան պետության կողմից:
Անկասկած, բոլոր երկրներում էլ կան ու եղել են մարզիկներ, որոնք դոպինգ են օգտագործում: Նման մարզիկները, իհարկե, արդար խաղի կանոնների համաձայն` իրավունք չունեն մասնակցելու սպորտային միջոցառումներին: Սակայն ի՞նչ մեղք ունեն այն մարզիկները, որոնք տարիներ շարունակ մարզվում են առանց արգելված դեղամիջոցներ օգտագործելու և իրենց կարիերայի գագաթնակետը համարում են օլիմպիական խաղերի մասնակցությունը: ՄՕԿ-ի որոշում շատ դաժան հարված էր այն «մաքուր» մարզիկների համար, որոնք իրենց կամքից անկախ այսօր զրկվում են իրենց կյանքի գուցե ամենակարևոր սպորտային իրադարձության մասնիկը դառնալուց:
