ԵՐԵՎԱՆ, 6 դեկտեմբերի — Sputnik. Սուսերամարտիկ Յանա Եգորյանը կարծում է, որ ոչ ոք իրավունք չունի քննադատելու ռուս մարզիկների` Փխենչխան մեկնելու և օլիմպիական դրոշի ներքո հանդես գալու ցանկությունը։ Այս մասին հայտնում է Չեմպիոնատը։
«Կարծում եմ, որ սա ամենաթողություն է։ Եթե հնարավորություն կա, մարզիկները պետք է պարտադիր մասնակցեն չեզոք դրոշի ներքո և ցուցադրեն երկար տարիների աշխատանքը։ Ես կմեկնեի չեզոք դրոշի ներքո։ Մարզիկներին պետք է հասկանալ, մեղադրելու ոչ մի իրավունք չունենք։ Ինչո՞ւ մարդիկ պետք է հրաժարվեն իրենց երազանքից։ Նրանք հենց այնպես չեն աշխատել 10, 15, 20 տարի», — ասել է Եգորյանը։
Նա նշել է, որ երկիրը պետք է սատարի իր մարզիկներին։
«Եթե մարզիկը հանդես է գալիս չեզոք դրոշի ներքո, չի նշանակում, որ նա Ռուսաստանի անունից հանդես չի գալիս։ Ամեն դեպքում նա մեր մարզիկն է, և նա մասնակցում է մեր կողմից։ Այո, օրհներգ չի լինի։ Եվ ի՞նչ։ Մի՞թե նշանակում է, որ նա մեր մարզիկը չէ։ Վերջ տվեք։ Կարծում եմ, որ Վլադիմիր Վլադիմիրովիչ Պուտինը պետք է միջամտի, որ մարզիկները հանդես գան գոնե չեզոք դրոշի ներքո։ Մաքուր մարզիկները չպետք է տուժեն», — նշել է Եգորյանը։
Նա ավելացրել է, որ եթե նման իրավիճակ ստեղծվեր ամառային օլիմպիադայի մարզիկների դեպքում, ինքն առանց մտածելու կմեկներ։
«Օրհներգը հաղթանակից հետո կարելի է նաև Ռուսաստանում երգել։ Պետք է մեկնել և հաղթել», — Instagram-ի ուղիղ եթերում ասել է Եգորյանը։
Հիշեցնենք, որ դեկտեմբերի 5-ին ՄՕԿ-ի գործադիր կոմիտեն Փխենչխանում անցկացվող 2018 թվականի ձմեռային Օլիմպիական խաղերին ռուս մարզիկներին թույլ է տվել մասնակցել միայն օլիմպիական դրոշի ներքո։ ՄՕԿ-ի որոշման համաձայն` մրցումների կարող են թույլ տալ մասնակցել այն մարզիկներին, որոնք դոպինգային սկանդալում չեն հայտնվել։ Նրանց թիմը կկոչվի «Ռուսաստանի օլիմպիական մարզիկներ», և նրանք հանդես կգան առանց օրհներգի ու ազգային հավաքականի համազգեստի։
