ԵՐԵՎԱՆ, 6 դեկտեմբերի — Sputnik, Անի Լիպարիտյան. Գերմանացի նկարազարդող Լասսե Վանդշնայդերն այժմ գտնվում է Հայաստանում` ԹՈՒՄՕ ստեղծարար տեխնոլոգիաների կենտրոնում երեքշաբաթյա սեմինարների շրջանակում։ Sputnik Արմենիային տված հարցազրույցում նա պատասխանեց տարբեր հարցերի, այդ թվում` պատրա՞ստ է արդյոք ամուսնանալ հայուհու հետ և ապրել մեր երկրում։ Ամուսնության վերաբերյալ հարցին նա ամաչեց պատասխանել, բայց Հայաստանում ապրելուց չի հրաժարվի։
«Ես կցանկանայի Երևան գալ և այստեղ ավելի երկար մնալ, կարծում եմ` շատ լավ կլիներ։ Ամենամեծ խնդիրը լեզվական արգելքն է… Ես տեսնում եմ, որ Հայաստանում հարգում են ավանդական ընտանեկան արժեքները», – ասաց նկարիչը։
Սեմինարներ Հայաստանում
Նրա խոսքով` նկարազարդումն օգնում է աշխարհին նայել այլ աչքերով, և դա մեր իրականության այլընտրանքն է։ Լասսեն Հայաստան է ժամանել հայ երեխաներին իր հսկայական գիտելիքները և հմտություններով ներկայացնելու մեծ ցանկությամբ։
«ԹՈՒՄՕ–ի հետ համագործակցությունը սկսվել է որոշ ժամանակ առաջ։ Ինձ էլեկտրոնային նամակ են ուղարկել, որպեսզի իմանան` կցանկանա՞մ արդյոք սեմինարներ անցկանցել այստեղ։ Դա հիանալի գաղափար էր, և ես հասկացա, որ սա հիանալի հնարավորություն է Հայաստանի հետ ավելի լավ ծանոթանալու, երեխաների հետ աշխատելու համար։ Ես նկարազարդող և կոմիքսների նկարիչ եմ, հուսով եմ` կհաջողվի նրանց փոխանցել իմ գիտելիքները», – ասաց Լասսեն։
Հենց այդ պատճառով նա համաձայնել է աշխատել Հայաստանում։ Այս պահին օգնում է երեխաներին Ամանորի և սուրբծննդյան թեմաներով բացիկներ պատրաստել։
Լասսեն խոստովանում է, որ այդքան էլ ծանոթ չէր Հայաստանին։
«Ես շատ բան չգիտեի Հայաստանի մասին, քանի դեռ չէի եկել այստեղ։ Իհարկե, լսել էի Հայոց ցեղասպանության մասին։ Երբ Բունդեսթագն այդ իրադարձությունները որպես ցեղասպանություն ճանաչեց, գերմանական լուրերն անընդհատ այդ մասին էին գրում։ Եթե ինձ հարցնեն` ինչի հետ է ասոցացվում Հայաստանը, կասեմ` նռան, լավաշի, ծիրանի և այլ համեղ մթերքների։ Ես շատ եմ սիրում ծիրան, հատկապես ծիրանաչիր», – հավելեց նկարիչը։
Լասսեն Հայաստան է ժամանել ընդամենը երեք շաբաթով, սակայն նա անպայման ցանկանում է վերադառնալ մեր երկիր։ Մինչ այդ նա Գերմանիայում ընդամենը մեկ հայ է ճանաչել, որը երբեք չի պատմել իր հայրենիքի մասին։ Նա իր գերմանացի ընկերոջը պատմել է միայն իր ազգի մասին։
«Հուսով եմ, որ կստացվի վերադառնալ, հայ երեխաների հետ աշխատելը հաճելի էր։ Ես միայն Երևանում եմ եղել, ցավոք սրտի, հիմա քիչ ժամանակ ունեմ ուղևորությունների համար, բայց անպայման ցանկանում եմ տեսնել Սևանա լիճը», – ասաց գերմանացի նկարիչը։
Նրա խոսքով` Հայաստանում մեծ քանակությամբ հետաքրքիր վայրեր կան, որոնք կարելի է այցելել` թանգարաններ, շուկաներ, փառատոներ և ոչ միայն։
Լասսեն կարծում է, որ հայերը շատ բարեհամբույր են, ջերմ և առատաձեռն։ Դա միակ բանը չէ, որ նրան գրավում է մեր երկրում։ Նա` որպես նկարիչ, բարձր է գնահատում ռեժիսոր Սերգեյ Փարաջոնվի ժառանգությունը։
