ԵՐԵՎԱՆ, 5 դեկտեմբերի — Sputnik. Սպառողական գները Հայաստանում նոյեմբերին թանկացել են 2%–ով։ Ազգային վիճակագրական ծառայությունն այսօր հրապարակել է նոյեմբեր ամսվա գնաճի տվյալները։
ԱՎԾ տվյալներով դժվար է դատել, թե իրականում քանի տոկոսով է թանկացել մարդու կյանքը, Sputnik Արմենիայի հետ զրույցում, անդրադառնալով ԱՎԾ հրապարակած տեղեկատվությանը, ասաց «Իրազեկ և պաշտպանված սպառող» հ/կ նախագահ Բաբկեն Պիպոյանը։
«Անգամ, եթե դիտարկենք, որ ունեցել ենք 2% գնաճ, բայց չենք ունեցել աշխատավարձերի բարձրացում, անվիճելի է, որ մարդկանց կյանքը վատացել է»,– ասաց Պիպոյանը` հավելելով, որ մեկ ամսվա համար 2%-այնքան էլ ցածր ցուցանիշ չէ։
Նոյեմբերին, պաշտոնական վիճակագրության տվյալներով, ամենաշատը թանկացել են ձուն (7.8%) ու կարագը (5.5%)։ Կաթնամթերքն ու պանիրը թանկացել են 3.5% –ով, մսամթերքը` 1.6, ձկնամթերքը` 0.3։ Հագուստը թանկացել է 3.4%–ով, բենզինն ու դիզելային վառելիքը` 0.5%-ով:
Թե ինչու են սպառողների դժգոհությունն առաջացրած կարագի ու ձվի թանկացման ցուցանիշները սպասվածից ցածր, Բաբկեն Պիպոյանը բացատրում է նրանով, որ թանկացումը տեղի է ունեցել ոչ թե մեկ, այլ վերջին 2-3 ամիսների ընթացքում։
«Մենք ունեցել ենք թանկացում ամռանը, սեպտեմբերին, հոկտեմբերին, ինչի արդյունքում մեր երկրում կարագը շուրջ 2 անգամ թանկացել է»,– ասում է Պիպոյանը։
Իսկ շաքարն ու շաքարավազը հոկտեմբերի համեմատ նոյեմբերին նույնիսկ էժանացել են` 1.6%–ով։ 0.2% –ով էժանացել են նաև սուրճը, թեյը, կակաոն, ոչ ալկոհոլային խմիչքները, հացաբուլկեղենն ու ձավարեղենը։
Ամսական կտրվածքով գնաճի թիվը մեծ չէ, բայց տարվա հաշվարկով այն բավական մեծ թիվ է կազմում, ինչն էլ, ըստ սպառողների շահերի պաշտպանի, իրապես ազդում է քաղաքացիների կյանքի որակի վրա։
«Այս տարվա ընթացքում սպառողի կյանքը միանշանակ վատացել է, և այն միֆերին, որ կյանքը լավացել է ՀՀ–ում, անգամ կառավարության ստորին օղակներում չեն հավատում»,– ասում է Բաբկեն Պիպոյանը։
Ի դեպ, 2017թ–ի նոյեմբերը գնաճի տեսակետից ամենածանրը չէ։ ԱՎԾ–ի տվյալներով, ռեկորդակիրն այս հարցում եղել է հունվարը, որի ընթացքում, նախորդ տարվա դեկտեմբերի համեմատ գրանցվել էր 2.7%–անոց գնաճ։
