ԵՐԵՎԱՆ, 1 դեկտեմբերի — Sputnik. Թուրքիայի քաղաքացիների նկատմամբ քրեական գործ է հարուցվել Արցախ այցելելու համար։ Այս մասին հայտնում է թուրքական Anadolu կայքը` հղում անելով Թուրքիայի արտգործնախարար Մևլութ Չավուշօղլուին։
Նախարարը նշել է «մեղավորների» անունները` գրող Սաիթ Չեթինօղլու, լրագրողներ Ալի Բայրամօղլու և Էրոլ Քադիրջիօղլու, քաղաքական գործիչ Ուֆուկ Ուրաս։
Չավուշօղլուի խոսքով, պաշտոնական Անկարան «ցավում է», որ Թուրքիայի քաղաքացիները նման այց են կատարել, քանի որ Լեռնային Ղարաբաղը, ըստ նրա, «Ադրբեջանի օրինական տարածքն է», և առանց պետական կառույցներին այդ մասին հայտնելու` Ղարաբաղ այցելելը «հանցագործություն է»։
«Հենց որ Ադրբեջանում քրեական գործ հարուցվեց, Թուրքիան էլ նման որոշում կայացրեց։ Այդ անձինք արդեն ցուցմունքներ են տվել դատական ատյաններում»,- ասել է նա` այլ մանրամասներ չհայտնելով։
Նշված անձինք Արցախ են այցելել 2017 թվականի սեպտեմբերի 22-ին։ Դրանից հետո Ադրբեջանը քրեական գործ է հարուցել նրանց նկատմամբ։
