Գոհար Սարգսյան, Sputnik.
Արտասահմանցի և սփյուռքահայ քաղաքական, մշակութային ու հասարակական գործիչները վերջին շրջանում ավելի հաճախ են այցելում Արցախ` չվախենալով «սև ցուցակ» կոչվածից։ Sputnik Արմենիան ներկայացնում է այն խիզախներին, որոնք այցելում են Արցախ ու պատիվ համարում «սև ցուցակում» հայտնվելը։
Դանիել Դեքեր
Ամերիկացի երգիչ և կոմպոզիտոր Դանիել Դեքերը 17-րդ անգամ է գալիս Հայաստան։ Վերջերս էլ նա ցանկություն է հայտնել Արցախում ներկայանալ մենահամերգով, Արցախին ձոնել իր մեծ սիրո մասին երգ։ Այդպես էլ արեց. Արցախի Հանրապետության հռչակման 26-րդ տարեդարձի առթիվ առաջին անգամ հնչեցրեց «Իմ Արցախ» երգը։
«Պատիվ ունեմ գտնվելու ադրբեջանական «սև ցուցակում»։ Այն ժամանակից, երբ գրեցի «Ադանա» ստեղծագործությունը, արդեն համոզված էի, որ ցուցակը պատրաստ է ինձ համար։ Ես դա նորմալ եմ համարում, որովհետև կանգնած եմ ճշմարտության կողքին»,- ասել է Դեքերը։
Ալեքսանդր Ցինկեր
Քնեսեթի նախկին պատգամավոր Ալեքսանդր Ցինկերն առաջիններից մեկն է հայտնվել «սև ցուցակում», այն բանից հետո, երբ այցելել է Արցախ։
«Հիմա այդ ցուցակում մոտ 600 մարդ կա, կարծում եմ` ժամանակի ընթացքում այդ թիվը կավելանա։ Ժամանակի ընթացքում ավելի շատ մարդ է այցելելու Արցախ։ Ադրբեջանական իշխանությունները պետք է հասկանան, որ այդ ցուցակները ոչինչ չեն փոխի»,- Sputnik Արմենիայի հետ բացառիկ զրույցում հայտնել է Ցինկերը։
Ի դեպ, նա «Հայաստան-Իսրայել» հասարակական ֆորումի համանախագահն է։ Ցինկերի կարծիքով` հայ-իսրայելական գործակցությունը լուրջ մտահոգություն է առաջացրել Ադրբեջանում։
Դանիել Ղազարյան
Ֆրանսիայի խորհրդարանի պատգամավոր Դանիել Ղազարյանը հոկտեմբերի 10-ին Հայաստան էր ժամանել հայկական անձնագիր ստանալու համար։ Նա հայտնել է, որ հայկական արմատներ ունեցող ֆրանսիացի պատգամավորների համար առաջնահերթություն է ԼՂ հիմնախնդիրը։
«Մոտ ժամանակներս հաճույքով կայցելեմ Արցախ, հիմա ժամանակի սղություն ունեմ։ Իսկ Ադրբեջանի «սև ցուցակն» ինձ չի վախեցնում»,-ասել է Ֆրանսիայի խորհրդարանի պատգամավորը։
Էդուարդ Լիմոնով
Ռուս գրող և հասարակական գործիչ Էդուարդ Լիմոնովը Արցախ կատարած այցի պատճառով նույնպես հայտնվել է Ադրբեջանի «սև ցուցակում»։
Ադրբեջանի ԱԳՆ պաշտոնական ներկայացուցիչ Հիքմեթ Հաջիևը հայտնել է, որ Լիմոնովն «ապօրինի» է այցելել «Ադրբեջանի օկուպացված տարածքներ», դրա համար էլ այդ ցուցակում է։
Էդուարդ Լիմոնովին առանձնապես չի մտահոգել «սև ցուցակում» հայտնվելու փաստը, և նա 2017 թ-ի հունիսին այցելել է Արցախ, որը նրան բնորոշմամբ` քրիստոնյա աշխարհի ամենահեռավոր հողակտորն է մոլորակի այդ հատվածում:
ԱՄՆ կոնգրեսականներ
ԱՄՆ կոնգրեսականներից միանգամից 3 հոգի հայտնվել են ադրբեջանական «Սև ցուցակում»։ Նրանք են` Դեյվիդ Վալադաոն, Ֆրանկ Փալլոնը և Թուլսի Գեբըրդը։
Այս մասին կրկին արտահայտվել է Ադրբեջանի ԱԳՆ մամուլի խոսնակ Հիքմեթ Հաջիևը:
«Հայաստանի և հայկական լոբբի հետ համատեղ իրականացված այդ գործողությունը նպաստում է ԵԱՀԿ ՄԽ ջանքերի զրոյացմանը»,- ասել է նա։
Ի դեպ, Դեյվիդ Վալադաոյի նախաձեռնությամբ ԱՄՆ արտաքին հատկացումներից մեկուկես միլիոն դոլար կհատկացվի Արցախում ականազերծման աշխատանքներ կատարելու համար։
Մոնսերատ Կաբալյե
Աշխարհահռչակ իսպանացի օպերային երգչուհի Մոնսերատ Կաբալյեն դեռևս 2013 թվականին այցելեց Արցախ, հանդիպեց երկրի բարձրագույն ղեկավարության հետ ու իր հիացմունքն արտահայտեց հայկական քրիստոնեական հուշարձանների առատության վերաբերյալ։
Դրանից հետո Ադրբեջանից արագ տեղեկություն տարածվեց` Կաբալյեի համերգն Ադրբեջանում այլևս անհնարին կլինի։
Աշխարհահռչակ երգչուհին համալրեց այն քաղաքական, մշակութային ու հասարակական գործիչների շարքը, որոնց անուններն ընդգրկված են տխրահռչակ «սև ցուցակում»։
Բրունո Լը Ռու
Ֆրանսիայի ներքին գործերի նախարար Բրունո Լը Ռուն Լեռնային Ղարաբաղում մասնակցել է անկախության 25-ամյակի միջոցառումներին ու ծանոթացել Ղարաբաղի առաջնագծում տիրող իրավիճակին։ Ինչպես միշտ պաշտոնական Բաքուն դա գնահատել է «ապօրինի» ու ներառել իր` «մերժվածների» ցուցակում։
«Ֆրանսիան Մինսկի խմբի համանախագահող երկիր է։ Մենք այստեղ ենք, որպեսզի կարողանանք քննարկել որոշ հարցեր և տեսնենք, թե ինչն է արգելափակում խաղաղության տանող գործընթացը»,- ասել է Բրունո Լը Ռուն։
Ի դեպ, ֆրանսիացի նախարարը նաև Հայոց ցեղասպանության ժխտումը քրեականացնող օրինագծի ընդունման ջատագովներից է։
Ըստ տարածված տեղեկությունների` նա զբաղեցնում է «սև ցուցակի» 91-րդ տեղը։
Լյուբով Կազարնովսկայա
Ռուս հայտնի օպերային երգչուհի Լյուբով Կազարնովսկայան վարպետության դասեր է անցկացրել Ստեփանակերտի Սայաթ-Նովայի անվան երաժշտական դպրոցում։ Ու չուշացավ արտգործնախարարության մամուլի ծառայության ղեկավար Հիքմեթ Հաջիևի հայտարարությունը` երգչուհին «սև ցուցակում է»։
«Ղարաբաղում ձգտում են խաղաղության և հարգում են մշակույթը։ Ավելի մեծ անհեթեթություն, քան անունս «սև ցուցակում» ընդգրկելն էր, անհնարին էր մտածել»,-ասել է երգչուհին։
Ալեքսանդր Լապշին
Արցախ այցելելու համար բլոգեր Ալեքսանդր Լապշինը ձերբակալվեց Բելառուսում և տեղափոխվեց Ադրբեջան։ Դատարանը նրան մեղավոր ճանաչեց 318.2 հոդվածով, որը պատիժ է նախատեսում «հանցավոր խմբի կազմում Ադրբեջանի պետական սահմանները» «անօրինական հատելու համար»:
Լապշինը 3 տարվա ազատազրկման դատապարտվեց առանց Ադրբեջանի իշխանության հետ համաձայնեցնելու Արցախ այցելելու համար:
Ավելի ուշ Ադրբեջանի նախագահ Իլհամ Ալիևը Լապշինին ներում շնորհելու մասին հրամանագիր ստորագրեց։
Արցախ այցելելու հետ կապված ամենաաղմկահարույց պատմությունը, թերևս, կապված էր հենց այս բլոգերի հետ, քանի որ Ադրբեջանը նրա պարագայում միայն «սև ցուցակով» չբավարարվեց։
