ԵՐԵՎԱՆ, 28 նոյեմբերի — Sputnik. Հայաստանի փաստաբանների պալատն առաջարկում է որոշ փոփոխություններ կատարել «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» աղմկահարույց օրենքում։ Նրանց համար կարևոր է, որ «վտանգավոր կետերը» բացառվեն։
«Նույնիսկ եթե այդ օրինագիծն ընդունվի, ապա լավ կլիներ, որ այնտեղ «վտանգավոր» կետեր չլինեին։ Մեզ մտահոգում է այն հանգամանքը, որ այս օրինագծով, ի վերջո, պետական մարմիններին ընտանիք ներխուժելու լիազորություն է տրվում: Ինձ՝ որպես փաստաբանի, սա անհանգստանում է, որովհետև եթե մենք պետական կառույցներին տալիս ենք ընտանեկան հարաբերություններին միջամտելու հնարավորություն, ապա մարդկանց իրավունքները խախտելու ռիսկ է առաջանալու», — այսօր լրագրողներին ասաց Փաստաբանների պալատի նախագահ Արա Զոհրաբյանը։
Երեխայի շահերը
Փաստաբաններն առաջարկում են երեխայի շահերի առաջնահերթության սկզբունքը փոխարինել երեխայի շահի սկզբունքով։
«Այդ փոփոխությունը կօգնի հետագայում խուսափել կամայական մեկնաբանություններից։ Երևակայենք իրավիճակ, եթե սահմանամերձ բնակավայրում ապրող երեխաներին սկսեն վերցնել` ղեկավարվելով երեխայի առաջնահերթ շահով, քանի որ, օրինակ, բնակավայրերը կարող են կրակոցների ենթարկվել Ադրբեջանի կողմից», — նշեց Զոհրաբյանը։
Նրա խոսքով` իրավակիրառական պրակտիկայում փաստաբանները պետք է առաջնորդվեն խելամտության կանխավարկածով։
«Պետք է հետևել ձևակերպումներին, որպեսզի ընտանիքը չվերածվի խոցելի թիրախի ու երեխաներին չխլեն նույնիսկ այն դեպքում, երբ ընտանիքը ֆինանսական դժվարություններ ունի», — ասաց փաստաբանը։
Հայ փաստաբանները կարծում են, որ պետք է հստակորեն սահմանել «ամուսիններ» հասկացությունը։ Փաստաբանների պալատն առաջարկում է մտցնել «փաստական ամուսնական հարաբերություններ» ձևակերպումը, որը թույլ կտա սահմանել զույգի միջանձնյա հարաբերությունները (փաստական ամուսնություն — խմբ.)։
Բռնության զոհերի ապաստարաններ
Փաստաբանները կարծում են, որ մասնավոր կազմակերպություններին չի կարելի թույլ տալ ընտանեկան բռնության զոհերի ապաստարաններ ստեղծել։
«Պետք է սահմանել, որ ապաստարաններ կարող են տրամադրել միայն պետությունն ու համայնքները։ Ապաստարանները կարող են հավատարմագրային կառավարման հանձնվել ոչ առևտրական կազմակերպություններին, որոնք գրանցված են Հայաստանի տարածքում։ Ընտանեկան բռնության կանխարգելման ու ընտանիքում հաշտության սահմանման վերականգնումը պետք է լինի բացառապես պետության իրավասության ներքո», — հավելեց Զոհրաբյանը։
Ըստ Փաստաբանների պալատի` ապաստարանը պետք է ունենա խորհուրդ, որի կազմը ձևավորվի լիազոր մարմնի սահմանված կարգով և քանակով՝ պետական կամ տեղական ինքնակառավարման մարմինների, առաքելական եկեղեցու և հասարակական կազմակերպության առնվազն մեկական ներկայացուցիչից:
Այս որոշումը կայացվել է` ելնելով ՀՀ Սահմանադրության 18-րդ հոդվածից, որում ասվում է` Հայ առաքելական եկեղեցուն տրվում է բացառիկ կարգավիճակ հայ ժողովրդի հոգևոր ու մշակութային կյանքում։
«Ընտանեկան բռնության կանխարգելման» մասին օրինագիծը պաշտոնյաների ու փորձագետների բուռն քննարկմանն է արժանացել։ Հատկապես վիճելի է համարվում ծնողների մեղավորության կանխավարկածի կետը։
Թեև Հայ առաքելական եկեղեցին առայժմ պաշտոնական հայտարարությամբ հանդես չի եկել, այնուհանդերձ հոգևորականները նույնպես օրինագիծը համարում են անհեթեթ, իսկ անվանումը` ոչ տրամաբանական։
2017թ-ի առաջին 9 ամսվա ընթացքում ոստիկանությունը քննել է ընտանեկան բռնության 602 դեպք, որոնց փաստերով հարուցվել է 142 քրեական գործ։ 2016 թվականի նույն ժամանակահատվածում գրանցվել է 521 դեպք, իսկ քրեական գործ է հարուցվել 97-ի փաստով։ Նույն ժամանակահատվածում գրանցվել է անչափահասների նկատմամբ բռնության 146 դեպք, որոնցից 52-ը` սեռական բնույթի։
