ԵՐԵՎԱՆ, 16 Նոյեմբեր — Sputnik. Այսօր կառավարության հերթական նիստի ընթացքում ՀՀ արդարադատության նախարար Դավիթ Հարությունյանը, անդրադառնալով «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենսդրական նախաձեռնությունների փաթեթին` ասաց, որ այդ օրենքը 2 նպատակ ունի։
«Մեկը կանխարգելել, երկրորդը՝ պաշտպանել: Հիմա քննարկումների փուլում արդեն երրորդ նպատակը ավելացավ՝ համերաշխության վերականգնման նպատակը»,-ասաց նա:
Նախարարի խոսքով`փոփոխությամբ նախատեսվում է մի շարք սահմանափակումներ բռնության գործած անձի նկատմամբ. պաշտպանել որոշակի հեռավորություն տուժողից, չմտնել կոնտակտի մեջ, չկրել, չպահել զենք, անցնել բուժման կուրս, օրինակ` ալկոհոլամոլությունից: Նա նշեց, որ պաշտպանական մեխանիզմները ևս սահմանափակումներ են ենթադրում, և խախտումների համար նախատեսված են քրեական և վարչական պատասխանատվության միջոցներ:
«Անհետաձգելի միջամտության պարագայում տուժողի կամքը պարտադիր չէ, քանի որ շատ հաճախ տուժողները բողոքելու դեպքում կրկնակի ենթարկվում են բռնության, բայց պաշտպանական որոշումն էլ միայն տուժողի կամքից է կախված»,-ներկայացրեց Հարությունյանը:
Նախարարի կարծիքով թյուր է այն տեսակետը, թե օրենքը նախատեսում է ծնողական իրավունքից անհիմն զրկում կամ ընտանեկան արժեքների խարխլում. «Պետք է մեկ անգամ հայտարարեմ, որ փաթեթը չի նախատեսում ծնողական իրավունքներից զրկման, կամ սահմանափակման որևէ նոր հիմք, որը կարող է խարխլել ընտանեկան արժեքները։ Դա կոշտ ամրագրել ենք, որ դադարեցնենք այն անհիմն քննադատությունը, որը հաճախ հնչում է այս օրենքի հասցեին»,-ասաց նա և վստահեցրեց, որ առանց ծնողի երեխային հնարավոր չէ վերցնել ընտանիքից և տեղափոխել ապաստարան:
