ԵՐԵՎԱՆ, 27 նոյեմբերի — Sputnik. Շփոթ, շոկ և ուրախություն. ահա այն զգացմունքները, որոնք կարելի էր տեսնել Պոլինա Բոգուսևիչի դեմքին, որը «Մանկական Եվրատեսիլում» հաղթանակ բերեց Ռուսաստանին։ Այս մասին գրում է Sputnik Գրուզիան։
Սա Ռուսաստանի երկրորդ հաղթանակն էր Տոլմաչևա քույրերի հաղթանակից հետո։ Երկրորդ հաղթանակին հասնելու համար 9 տարի պետք եղավ։
13 տարեկան Պոլինան ստացավ 188 միավոր և դարձավ մրցույթի առաջատար։ Թբիլիսիում առաջին անգամ անցկացված մրցույթին մասնակցեցին 16 երկրի ներկայացուցիչներ։
Հայաստանի ներկայացուցիչ Միշա Գրիգորյանը զբաղեցրեց 6-րդ հորիզոնականը։
Գլխավորը հավատալն է
Հաղթելու հնարավորություն միշտ կա, եթե անգամ դու տարբեր երկրներ ներկայացնող տաղանդավոր երեխաների շարքում ես, մամուլի ասուլիսի ժամանակ ասաց Պոլինան։
«Ես առաջ ասում էի, որ հավատում եմ հաղթանակին։ Բայց կարծում եմ, որ այստեղ բոլորն էին տաղանդավոր։ Ես հաղթելու փոքր տոկոս ունեի։ Կարծում եմ` հաղթանակը կտոնեմ ծնողներիս, հարազատներիս ու ընկերներիս հետ, որոնք սատարում էին ինձ։ Մենք երևի որևէ տեղ կգնանք ու կտոնենք»,- ասաց նա` խոսելով իր մոտակա ծրագրերի մասին։
Փայլուն հաղթանակի կապակցությամբ Պոլինային շնորհավորել է նաև «Եվրատեսիլ» մրցույթի ղեկավար Յան Օլա Սանդը, իսկ Վրաստանում մրցույթի պրոդյուսեր Սերգի Գվարջալաձեն կանխատեսել է, որ աղջիկը երբեք չի մոռանա Վրաստանը և նորից կգա այս երկիր։
Ո՞վ օգնեց Ռուսաստանին
Ռուսաստանն ամենաբարձր 12 միավոր ստացավ Վրաստանից, Պորտուգալիայից, Ավստրալիայից և Մակեդոնիայից։ 10 միավոր նվիրեցին Բելառուսն ու Կիպրոսը։ Լեհաստանը, Նիդեռլանդներն ու Մալթան ռուսաստանցի մասնակցին տվեցին 8 միավոր, Սերբիան ու Ալբանիան` 7։ Ռուսաստանին ամենացածր միավորներ տվեցին Իռլանդիան ու Ուկրաինան (5), Հայաստանն (4) ու Իտալիան (2)։
«Շնորհակալություն բոլոր նրանց, ովքեր քվեարկեցին իմ օգտին։ Մեծ շնորհակալություն Վրաստանին հիասքանչ շոուի համար»,- ասաց Պոլինան պարգևատրման արարողությունից հետո։
Նա խոստացավ, որ այս հաղթանակից հետո կանգ չի առնելու` նոր երգեր ու նոր ալբոմներ է ներկայացնելու հանդիսատեսին։
