ԵՐԵՎԱՆ, 6 նոյեմբերի–Sputnik. Հետաքրքիր ու համոզիչ CV գրել և հարցազրույցի գնալիս պատշաճ հագնվել։ «Հայկական PR ասոցիացիայի» նախագահ Աստղիկ Ավետիսյանն այդ երկու գործոնը չափազանց շատ է կարևորում աշխատանքի ընդունվելիս ։ Հայ երիտասարդները, մեծամասամբ, խնդիրներ են ունենում նշյալ երկու պահանջների դեպքում, համոզված է Ավետիսյանը։
«Մենք փոքրիկ հարցում էինք իրականացրել, թե ինչպիսի հագուստով են երիտասարդները ներկայանում գործատուին։ Պարզվել է, որ նրանք, հաճախ, իրենց լավագույն հագուստով են հարցազրույցի գնում, իսկ հիմնականում այդ լավագույնը տոնական հագուստն է»,– ասաց Ավետիսյանը։
Գործատուի հետ հանդիպման գնալիս, Ավետիսյանի խորհրդով, նախընտրելի է զուսպ և միագույն հագնվել։
Ինքնակենսագրականին էլ հայաստանցիները կցում են այնպիսի լուսանկարներ, որոնք, մեղմ ասած, զվարճալի են։ Ասենք, հաճախ են ուղարկում ծովափնյա լուսանկարներ ու սելֆիներ։ Անհրաժեշտ է խուսափել նման լուսանկարներից։
Մարքեթոլոգ, ինչպես նաև բանան ներկրող ընկերություններից մեկի տնօրեն Վահրամ Միրաքյանն ասում է` խնդիրը թաղված է բուհերում։ Այստեղ երիտասարդին չեն սովորեցնում պիտանի լինել գործատուին։
«Բուհերում ինֆորմացիա են տալիս, այլ ոչ թե գիտելիք։ Հաճախ ժամկետանց ինֆորմացիա են լցնում ուսանողների գլուխը և մտածում են, որ դրանով կարող են աշխատանքի անցնել, բայց պարզվում է, որ չեն կարող։ Օրինակ` ես նայում եմ դիմողի պոտենցիալ ունակություններին, երբ աշխատանքի եմ ընդունում, եթե դա տեսնում եմ, սկսում եմ նրա համար ներդրում անել, որ աճի»,– ասաց Միրաքյանը։
Հստակ հմտութություններ և պահանջներ են ներկայացնում «Արմենիա» ավիաընկերությունում։ Այդ պահանջներին կցում են նաև ճիշտ CV-ի օրինակներ։ Բայց արի ու տես, որ աշխատանք փնտրողներն ընտրում են հեշտ տարբերակը` կարճ ու արագ, նաև անփույթ շարադրում են իրենց մասին մի քանի տող և ուղարկում։
«Ամենազվարճալին մեզ ուղարկված ռեզյումեներից մեկն էր. երիտասարդը բոլոր նախադասությունները գրել էր հայատառ, բայց լատինատառ տրամաբանությամբ, օրինակ, «բարեվ դզեզ»։ Մինչև հիմա այդ դեպքը հիշում ենք և ծիծաղում։ Բացի այդ, գրում են, որ գերազանց տիրապետում են ռուսերենին և անգլերենին, մեկ էլ պարզվում է, որ ոչ թե գերազանց, այլ տարրական գիտելիքներ ունեն»,– ասաց «Արմենիա» ավիաընկերության փոխտնօրեն Գևորգ Խաչատրյանը։
Հայաստանում գործատուների 41 տոկոսը կարևորում է, թե որ բուհն են ավարտել ապագա աշխատակիցները։ Այնինչ, աշխատանքի ընդունվողների պոտենցիալը և մոտիվացիան մղվել են երկրորդ պլան` համապատասխանաբար 18 և 10 տոկոսով։ Այդ ուսումնասիրությունն անցկացրել է Երիտասարդական ուսումնասիրությունների ինստիտուտը։
«Ավելի շատ գնահատվում են գործնական հմտությունները, տեսական գիտելիքները և աշխատանքային փորձը` համապատասխանաբար 25, 24, 20 տոկոսով»,– հայտնեց ինստիտուտի աշխատակիցներից մեկը։
Այսօր լուրջ, իրենց հարգող կազմակերպությունները ներկայացնում են միջազգային չափորոշիչներին համապատասխան պահանջներ։ Sputnik Արմենիայի զրուցակիցները միաբերան հաստատում են, որ աշխատանք փնտրողները ջանք չեն ներդնում այդ պահանջներին համապատասխանելու համար։
Իր ունակությունները չգերագնահատող, միաժամանակ, զարգացած ու համարձակ երիտասարդները Հայաստանում գործ ունեն։ Նրանց փնտրում են գործատուները։
