ԵՐԵՎԱՆ, 31 հոկտեմբերի — Sputnik. Պետական ապարատի կրճատման և օպտիմալացման արդյունքում Հայաստանում կրճատվել է 5500 աշխատատեղ։ 5500-ը ոչ թե կրճատված անձանց քանակն է, այլ հաշվարկային ցուցանիշ, Sputnik Արմենիայի խնդրանքով մեկնաբանելով երեկ ՀՀ պետական բյուջեի քննարկման ժամանակ հնչած թվային տվյալը` նշեց ՀՀ ֆինանսների նախարար Վարդան Արամյանը:
«Չի բացառվում, որ այդ 5500-ի մեջ լինեն նաև թափուր աշխատատեղեր, որոնք դուրս են գալիս շրջանառությունից: Այսինքն՝ չի կարելի ասել, որ այդ 5500-ն էլ ամբողջովին զբաղված էին և հիմա համալրեցին գործազուրկների բանակը»,- ասաց նախարարը:
Բացի այդ Արամյանը չթաքցրեց, որ կառավարության առաջնահերթությունը հարկատուների հաշվին, զուտ սոցիալական խնդիր լուծելու համար աշխատատեղ պահելը չէ, այլ պետության միջոցների նպատակային օգտագործումը:
Ֆինանսների նախարարն առաջարկեց, օրինակ, ազատված միջոցների հաշվին ավելացնել գյուղատնտեսության ոլորտի հատկացումները, ինչն էլ թույլ կտա աջակցել հանրության անապահով խավերին:
Վարդան Արամյանին զարմացրել է, թե ինչու է այս ցուցանիշի հրապարակումը աղմուկ բարձրացրել հասարակության շրջանում, քանի որ, ըստ նրա, մինչ այդ պարբերաբար քննադատության էր ենթարկվում պետական ապարատի ուռճացված լինելը:
ՀՀ ֆինանսների նախարար Վարդան Արամյանը նախօրեին ԱԺ-ում հայտնել էր, որ հաջորդ տարվա սկզբին պետական հատվածում կաշխատի 138,5 հազար մարդ: Աշխատավարձի ընդհանուր ֆոնդը կկազմի 243,5 մլրդ դրամ` կրճատվելով 3 մլրդ դրամով:
Պետական առողջապահական հաստատություններում աշխատակիցների թիվը կնվազի`34,145 հազարից մինչև 32,571 հազար, կրթական ոլորտում`66.409-ից մինչև 63.612 հազար, հանգստի-ժամանցի ոլորտում` 8.499-ից մինչև 8288, սոցիալական ծառայությունների ոլորտում`3096-ից մինչև 3072, տնտեսության ոլորտներում`6203-ից մինչև 5978, կառավարման ապարատում`19221-ից մինչև 18444, գիտության ոլորտում կպահպանի անձնակազմի թիվը`5778 մարդ:
