ԵՐԵՎԱՆ, 24 հոկտեմբերի — Sputnik. Իրավապահ մարմինները կարծում են, որ «ԴՈՆ» ավտոմայրուղու 43-րդ կիլոմետրում «Ռանդ-Տրանս» ՍՊԸ-ի ներկայացուցչին 25 տարեկան հայ է սպանել, հայտնում է «Մոսկովսկի կոմսոմոլեցը»։
Երկու փոխադրող ընկերությունների աշխատակիցների միջև հրաձգությունը, որը տեղի է ունեցել դեռ ապրիլի սկզբին, վաղեմի վեճի շարունակություն է եղել։ Ոստիկանությանը հրաձգության մասին հայտնել էին մոտակայքում գտնվող բենզալցակայանի աշխատակիցները։
Հաղորդման համաձայն` ինչ-որ կովկասցիներ մարդատար ավտոմեքենաներից սկսել են կրակել երթուղային միկրոավտոբուսների վարորդների ուղղությամբ։ Երբ չարագործների փամփուշտները վերջացել են, նրանք հեռացել են «Լադա», «Շկոդա Օկտավիա» և «Մերսեդես» մակնիշի ավտոմեքենաներով։
Հրաձգության հետևանքով մահացել է 34 տարեկան չեչեն Մուհամմեդ Ումալատովը։ Եվս երեք տղամարդ տարբեր աստիճանի հրազենային վնասվածքով տեղափոխվել են Դոմոդեդովոյի հիվանդանոց։ Նրանք բոլորը «Ռանդ-Տրանս» ՍՊԸ-ի աշխատակիցներ են։
Քննիչներին չի հաջողվել չարագործներին ձերբակալել հանցագործության վայրում։ Սակայն նրանց հաջողվել է իմանալ, որ երկու փոխադրող ընկերության միջև վաղեմի վեճ է եղել։ «Ռանդ-Տրանս» ՍՊԸ-ն և «Սատուրն Թրևլ» ՍՊԸ-ն վիճել են ապօրինի ճանապարհով երթուղի ստանալու համար։
Բացի այդ պարզվել է, որ «Սատուրն-թրևլ» ՍՊԸ-ի վարորդներից մեկին միջադեպից մի քանի օր առաջ ծեծել էր անհայտ անձը։ Ենթադրվում է, որ հրաձգությունն այդ հարձակման պատասխանն է եղել։
Ուժային կառույցները փամփուշտների պարկուճներից պարզել են, որ կրակել են «ՏՏ» և «Մակարով» տեսակի ատրճանակներից, ինչպես նաև «Օսա» տրավմատիկ զենքից։ Օպերատիվ-հետախուզական վարչության աշխատակիցները պարզել են նաև հարձակում իրականացրած չորս անձից մեկի ինքնությունը։ Նա Մոսկվայի մարզի Ռամենսկի շրջանի Օստրովցի գյուղի բնակիչներից է, որն այժմ գործազուրկ է։
Տղամարդու բնակարանում խուզարկություն իրականացնելուց հետո քննիչները դաշնային հետախուզում են հայտարարել նրա նկատմամբ։ Չարագործին ձերբակալել են Կրասնոդարի երկրամասում տեղի ունեցած միջադեպից միայն կես տարի անց։ Կասկածյալը թաքնված է եղել բարեկամների մոտ։
«Ներկա պահին անհրաժեշտ համալիր հետաքննչական գործողություններ են իրականացվում, որոնց նպատակն է ամրապնդել ապացույցների բազան», — պարբերականին է պատմել Մոսկվայի մարզի Ռուսաստանի Դաշնության ՔԿ ՔԳՎ-ի ղեկավարի ավագ օգնական Եվգենյա Կիրյուշինան:
Քրեական գործի հետաքննությունը շարունակվում է։
