ԵՐԵՎԱՆ, 23 հոկտեմբերի – Sputnik. Նորապատ գյուղում հրդեհի ճիրաններում հայտնված շենքը 4-րդ կարգի վթարային էր ու կառուցված էր հիմնականում փայտից։ ՀՀ ԱԻՆ Արմավիրի մարզի փրկարարական վարչության պետ Հովհաննես Մարգարյանի խոսքով` սրանք էին շենքի արագ մոխրանալու հիմնական պատճառները։
«30-ական թվականների բարձր վթարայնության շենք էր։ Այդ շենքն ամեն դեպքում բնակության համար պիտանի չէր։ Երեկ գիշեր մարդկանց կացարան տրամադրելու օգնություն առաջարկեցին, սակայն նրանք հրաժարվեցին»,-ասաց Մարգարյանը։
Նրա խոսքով` հենց այսօր քաղաքապետարանը մարզպետարանի աջակցությանը կդիմի բնակիչներին ժամանակավոր կացարաններ տրամադրելու համար։
Նշենք, որ հոկտեմբերի 22-ին, ժամը 22:19-ին ԱԻՆ-ն ահազանգ էր ստացել, որ հրդեհ է բռնկել Արմավիրի մարզի Նորապատ գյուղի 5-րդ փողոցի շենքերից մեկում:
Դեպքի վայր էր մեկնել հինգ մարտական հաշվարկ, հոգեբանական աջակցության բաժնի հրահանգիչը և արտակարգ իրավիճակների արձագանքման և օպերատիվ խմբերը:
Ժամը 23:16-ին հայտարարվել էր հրդեհի բարդության 3-րդ աստիճան. դեպքի վայր էր մեկնել ևս երեք մարտական հաշվարկ:
Հրդեհը մեկուսացվել է ժամը 00:48-ին:
