ԵՐԵՎԱՆ, 21 հոկտեմբերի — Sputnik. Արցախում լարվածության հնարավորությունը մեծապես պայմանավորված է Ադրբեջանի ներքին իրավիճակով, Sputnik Armenia-ին ասել է իսրայելացի հրապարակախոս և հասարակական գործիչ, քաղաքագետ Ավանգարդ Էսքինը:
«Արցախում լարվածությունը կախված կլինի Ադրբեջանի ներքին զարգացումներից, նրանից, թե ինչպես նախագահ Ալիևը կկարողանա պահպանել իր դիրքերը»,- ասել է Էսքինը:
Նրա խոսքով՝ Ադրբեջանի ղեկավարը գտնվում է տարբեր կողմերից ճնշման ներքո, հակված է հակամարտության սրման: Մինչև վերջերս, ըստ Էսքինի, Ալիևը չէր ձգտում դրան:
«Ներքին ճնշման տակ ես նկատի ունեմ վիճակի վատթարացումը, անկայունությունը երկրի ղեկավարությանը դրդում է ինչ-որ արտաքին բնույթի գործողությունների»,- ասաց Էսքինը:
Ըստ նրա՝ հնարավոր չէ հստակ ասել, թե ինչպես են զարգանալու իրադարձությունները: Շատ բան կախված է Ռուսաստանի հետ հարաբերությունից և նրա դիրքորոշումից:
Ալիևը և Սարգսյանը հոկտեմբերի 16-ին Ժնևում բանակցություններ են վարել ԵԱՀԿ Մինսկի խմբի համանախագահների նախաձեռնությամբ՝ քննարկելու Արցախի հակամարտության կարգավորման հարցը: ԵԱՀԿ Մինսկի խմբի համանախագահները հայտարարել են, որ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը կայացել է կառուցողական մթնոլորտում:
Երեք օր անց Արցախի հետ շփման գծում զոհվեց հայ զինվոր:
