ԵՐԵՎԱՆ, 20 հոկտեմբերի — Sputnik. Հինգշաբթի Սոչիում անցկացվող երիտասարդների և ուսանողների փառատոնից ստացած հաղորդումն այն մասին, թե հայ և ադրբեջանական պատվիրակությունների միջև սկանդալ է տեղի ունեցել, հետաքրքրություն է առաջացրել ու քննարկումների թեմա դարձել: Իրավիճակը տեղում փորձել է պարզել Sputnik-ի թղթակիցը:
«Կոմերսանտ» թերթի լրագրող Անդրեյ Կոլեսնիկովն իր ռեպորտաժում նշում է. «Ինձ պատմեցին, որ ադրբեջանական պատվիրակության ներկայացուցիչները ներխուժել են փառատոնի գլխամասային գրասենյակ` պահանջելով հեռացնել հայկական պատվիրակության ստենդի քարտեզը. Արցախը քարտեզում պատկերված էր որպես Հայաստանի մաս:Երկար բանակցություններից հետո շտաբում նրանց առաջարկվում է կախել իրենց քարտեզը, որի վրա Արցախը պատկերված կլինի որպես Ադրբեջանի մաս: Որքան էլ զարմանալի է, բոլորն անմիջապես հանդարտվեցին. որոշումն ընդունելի էր»:
«Կոմերսանտի» հոդվածը պատճառ է դարձել ադրբեջանական պատվիրակության ծայրահեղ դժգոհության համար, որը պահանջել է հերքում հրապարակել։ Իմանալով Ադրբեջանի ներկայացուցիչների բավականին նյարդային վերաբերմունքի մասին, Sputnik-ի թղթակիցը զրուցեց երկու երկրների ներկայացուցիչների հետ:
Հայկական պատվիրակության անդամ Լիլիթ Հարությունյանը հերքել է սկանդալի մասին լուրերն` ասելով, որ ստենդի վրա, իսկապես, եղել են քարտեզներով բուկլետներ, սակայն Արցախը ներկված չի եղել ոչ մի, ոչ էլ մյուս երկրի գույնով։
«Դրանով մենք ցանկացել ենք ցույց տալ, որ Արցախն առանձին հանրապետություն է, որը կախված չէ ոչ Հայաստանից, ոչ Ադրբեջանից։ Հայաստանի պատվիրակությունը փառատոնի ոգու կրողն է, և չի պատրաստվում այդ խնդիրը քաղաքական շրջանակների մեջ դնել»,- ասաց Հարությունյանը։
Ընդ որում՝ նա ավելացրեց, որ ադրբեջանական ստենդը նվերներ է առաջարկում Facebook-ում «Ղարաբաղ, Ադրբեջան» հեշթեգեր դնելու պայմանով, հայկական պատվիրակությունը դա ապացուցող համապատասխան լուսանկարներ ունի։
Ադրբեջանի երիտասարդական կազմակերպությունների ազգային խորհրդի նախագահ Սեյմուր Հուսեյնովն, իր հերթին, պարզաբանել է, որ իրենց պատվիրակության անդամները շատ զարմացած են եղել «Կոմերսանտում» տպագրվածի վերաբերյալ:
Նա ասաց, որ նման բան չի եղել. ոչ ոք ոչ մի տեղ չի ներխուժել, վստահ լինելու համար կարելի է դիտել տեսախցիկների ձայնագրությունները: Ընդ որում՝ Հուսեյնովը նշել է, որ հայկական պատվիրակության ստենդին եղել են քարտեզներ, որոնց վրա Արցախը նշված է եղել որպես Հայաստանի տարածք և քարտեզներ, որտեղ այն առանձնացված է եղել առանձին գույնով: Քարտեզները բրոշյուրներում, բուկլետներում և գրքերում են:
Հուսեյնովի կարծիքով՝ նման նյութերը անընդունելի են փառատոնին և խախտում են նրա պայմանները: Ադրբեջանական պատվիրակությունը շտապել է պաշտոնական նամակ ուղարկել` այդ նյութերը հեռացնելու խնդրանքով, սակայն խնդրանքը չի կատարվել: Այդուամենայնիվ, Հուսեյնովը պնդում է, որ ոչ ոք ոչ մի տեղ չի ներխուժել և բարձրաձայն ոչինչ չի պահանջել:
Հավանաբար, իրականում ոչ մի արտառոց բան տեղի չի ունեցել։ Առավել ևս, որ ««Կոմերսանտը» նշում է, որ անձամբ միջադեպի ականատես չի եղել. այդ մասին նրան պարզապես «պատմել են»։
Սոչիում անցկացվող Համաշխարհային փառատոնին, որը կտևի մինչև հոկտեմբերի 22-ը, մասնակցում է մոտ 20 հազար մարդ աշխարհի ավելի քան 180 երկրից։ Sputnik միջազգային տեղեկատվական գործակալությունն ու ռադիոն լուսաբանում է Երիտասարդների և ուսանողների XIX համաշխարհային փառատոնի ընթացքը։ Գործակալությունը միջոցառման միջազգային տեղեկատվական գործընկերն է։