ԵՐԵՎԱՆ, 18 հոկտեմբերի — Sputnik. Պաշտոնական Երևանը կհայտնի Հայաստանի և Ադրբեջանի արտաքին գերատեսչությունների ղեկավարներ Էդվարդ Նալբանդյանի և Էլմար Մամեդյարովի հանդիպման մասին, եթե որոշվի հանդիպման կոնկրետ վայրն ու օրը, Sputnik Արմենիային ասաց ՀՀ ԱԳՆ մամուլի քարտուղար Տիգրան Բալայանը։
«Եթե հստակ պայմանավորվածություն լինի հանդիպման տեղի և օրվա վերաբերյալ, կհայտնենք այդ մասին», – ասաց Բալայանը։
Ավելի վաղ Ադրբեջանի ԱԳՆ ղեկավար Էլմար Մամեդյարովը լեհ գործընկեր Վիտոլդ Վաշիկովսկու հետ համատեղ մամուլի ասուլիսի ժամանակ հայտարարել էր, որ հանդիպում է նախատեսվում իր հայ գործընկեր Էդվարդ Նալբանդյանի հետ։
Նրա խոսքով` ԱԳՆ ղեկավարների հանդիպման ժամանակ «կոնկրետ» քննարկումներ են լինելու։
Հիշեցնենք, որ Ժնևում հոկտեմբերի 16-ին, ՄԱԿ–ի գրասենյակում, Շվեյցարիայի մշտական ներկայացուցչի նստավայրում անցկացվեցին Արցախյան հակամարտության կարգավորման թեմային նվիրված Հայաստանի և Ադրբեջանի նախագահներ Սերժ Սարգսյանի և Իլհամ Ալիևի բանակցությունները։
ԵԱՀԿ ՄԽ համանախագահները հայտարարեցին, որ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը կառուցողական մթնոլորտում անցավ։
Նախագահները պայմանավորվեցին միջոցներ ձեռնարկել բանակցային գործընթացի աշխուժացման համար, ինչպես նաև լրացուցիչ քայլեր ձեռնարկել շփման գծում լարվածության նվազեցման համար, գրված է միջնորդների հայտարարության մեջ։
