ԵՐԵՎԱՆ, 17 հոկտեմբերի — Sputnik. Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի ժնևյան հանդիպումը, որը տեղի ունեցավ երկարատև դադարից հետո, մի քիչ այլ էր, քան նախորդները, Sputnik Արմենիա մամուլի կենտրոնում հրավիրված ասուլիսի ընթացքում ասաց քաղտեխնոլոգ Վիգեն Հակոբյանը։
Հայաստանի ու Ադրբեջանի նախագահների հանդիպումը կայացել է հոկտեմբերի 16-ին Ժնևում, ԵԱՀԿ Մինսկի խմբի համանախագահների նախաձեռնությամբ։
«Հայ-ադրբեջանական հարաբերություններում նոր դինամիկա է նկատվում Ղարաբաղյան հակամարտության հարցի շուրջ»,- ասաց Հակոբյանը։
Դրա վկայությունն են այն մեսիջները, որոնք կարելի է առանձնացնել առաջնորդների հանդիպումից, դրանց թվում է նաև այն, որ համանախագահները գոհ են մնացել բանակցություններից։
Քաղտեխնոլոգի խոսքով, նրանք պայմանավորվել են շփման գոտում լարվածությունը նվազեցնելու շուրջ, սակայն առայժմ հայտնի չէ` դա լինելու է դիտորդների թիվն ավելացնելու հաշվին, թե այլ մեխանիզմներ են կիրառվելու։
Վիգեն Հակոբյանը առանձնացրեց նաև Հայաստանի և Ադրբեջանի նախագահների առանձնազրույցի պահին արված լուսանկարը, որը լուսանկարչական հաղորդագրություն էր այն բանի, որ ինչ-որ գործընթաց, այնուամենայնիվ, մեկնարկել է, և որը շարունակություն է ունենալու:
Քաղտեխնոլոգի կանխատեսումներով, մինչև 2018 թվականի ապրիլը նախագահները ևս մեկ անգամ կհանդիպեն և գուցե այդ անգամ անդրադառնան արդեն բուն փաստաթղթին:
ՀՀ և Ադրբեջանի նախագահների ԼՂ խնդրի կարգավորման շուրջ հանդիպումն ու բանակցությունները տեղի են ունեցել Ժնևի ՄԱԿ-ի գրասենյակում և այլ միջազգային կազմակերպություններում Շվեյցարիայի մշտական ներկայացուցչի կեցավայրում։
Հանդիպմանը ներկա են եղել նաև երկու երկրների արտաքին գործերի նախարարներ Էդվարդ Նալբանդյանն ու Էլմար Մամեդյարովը, ԵԱՀԿ ՄԽ համանախագահներ Իգոր Պոպովը, Էնդրյու Շեֆերը, Ստեֆան Վիսկոնտին և ԵԱՀԿ գործող նախագահի անձնական ներկայացուցիչ Անջեյ Կասպրշիկը։
Հանդիպման ավարտին տեղի է ունեցել նաև Սերժ Սարգսյանի և Իլհամ Ալիևի առանձնազրույցը:
