ԵՐԵՎԱՆ, 17 հոկտեմբերի — Sputnik. Ղրղըզստանի էկոնոմիկայի նախարարությունը սահմանի հետ կապված իրավիճակի կապակցությամբ դիմել է Եվրասիական տնտեսական հանձնաժողովին։ Այս մասին հայտնում է ՌԻԱ Նովոստին` հղում անելով գերատեսչության մամուլի ծառայությանը։
Դիմումում նշված է, որ ղազախական կողմը պետական սահմանին չի պահպանում Եվրասիական տնտեսական միության նորմերը, և ղրղըզական բեռնափոխադրողներն ու գործարարները լուրջ խնդիրների են բախվում։
Նախարարությունից հայտնում են, որ Ղազախստանը բոլոր հսկիչ-անցակետերում հավելյալ ստուգումներ է սահմանել, ինչը սահմանափակում է ապրանքների տեղաշարժը, և միաժամանակ խախտվում է ԵԱՏՄ միասնական շուկայի հիմնական սկզբունքներից մեկը։
Այս կապակցությամբ Ղրղըզստանի էկոնոմիկայի նախարարությունը նամակ է ուղղել ԵԱՏՄ կոլեգիայի նախագահ Տիգրան Սարգսյանին` նշելով, որ այդ հարցը պետք է քննարկվի կոլեգիայի առաջիկա նիստում։
Ղրղըզստանի պետական սահմանապահ ծառայության տվյալով, նախկինում երկրների միջև առկա խոշոր սահմանակետերում սահմանը հատողների թիվը կազմում էր օրական 8.1 հազար մարդ, այսօր այն հասել է 3.4 հազարի։ 662 միավոր տրանսպորտայինն միջոցներից այս պահին սահմանը հատում է 350-ը։
Ղրղըզստանից Ղազախստանի սահման անցնելու խնդիրը ծագել է հոկտեմբերի 10-ին։ Նշվում է, որ մարդիկ ժամեր շարունակ չեն կարողացել հատել սահմանը։
Հոկտեմբերի 11-ին Ղազախստանը հայտարարել է, որ սահմանային հավելյալ հսկողության պատճառը պլանային գործողություններն են, իսկ Տեղեկատվության և հաղորդակցությունների նախարարությունը հայտարարել է, որ ղազախա-ղրղըզական սահմանին իրավիճակը կայուն է։
