ԵՐԵՎԱՆ, հոկտեմբերի 6 — Sputnik. Ռուսաստանը Հայաստանից ակնկալում է, որ ակտիվորեն առաջ կմղի եվրասիական ինտեգրումը, լրագրողներին ասաց Ռուսաստանի նախագահի` եվրասիական ինտեգրման հարցերով խորհրդական Սերգեյ Գլազևը Եվրասիական գործընկերության հայ-ռուսական միջտարածաշրջանային 6-րդ համաժողովի ժամանակ։
«Եվրասիական տնտեսական հանձնաժողովը ղեկավարում է Հայաստանի ներկայացուցիչը, ու մենք Եվրասիական տնտեսական ինտեգրման հարցում ակնկալում ենք ակտիվ, հարձակողական դիրքորոշում», — ասաց Գլազևը։
Նրա խոսքով` բաց է մնում միասնական արդյունաբերական քաղաքականության ձևավորման հարցը։ Չնայած արդյունաբերական արտադրանքի միասնական շուկայի ստեղծմանն ու Մաքսային միությանը, անհրաժեշտ է ստեղծել զարգացման ռազմավարության ընդհանուր հասկացություն։
«Անհրաժեշտ է համատեղ կորպորացիաներ ձևավորել, հակառակ դեպքում մեր տարածքում ուրիշների ապրանքներն են վաճառվելու`եվրոպական, չինական։ Բայց մենք պետք է ինքներս մեր տարածքը յուրացնենք», — նշեց Գլազևը։
Հայաստանն, առաջին հերթին, պետք է մտածի մեքենաշինության ու բարձր տեխնոլոգիաների ոլորտի արդյունաբերության մասին, որտեղ այն մեծ գիտատեխնիկական ներուժ ունի։
Բացի այդ, Գլազևի խոսքով` ֆինանսական ոլորտը հետ է մնում ինտեգրումից։ ԵԱՏՄ-ի անդամներն իրեն գործարքների համար երրորդ երկրների արժույթն են օգտագործում։
«Պետք է սեփական ֆինանսատնտեսական ենթակառուցվածք ձևավորել», — նշեց Գլազևը։
Հայաստանը ԵԱՏՄ լիարժեք անդամ է դարձել 2015 թվականի հունվարի 2-ից։ Կազմակերպության մեջ ներառված են նաև Ռուսաստանը, Բելառուսը, Ղազախստանն ու Ղրղըզստանը։
