ԵՐԵՎԱՆ, 17 հոկտեմբերի — Sputnik. ՄԱԿ-ի գլխավոր քարտուղար Անտոնիո Գուտերեշը ողջունել է Ադրբեջանի և Հայաստանի ղեկավարների` Լեռնային Ղարաբաղի հակամարտության վերաբերյալ հանդիպումը և կոչ արել նրանց հասնել իրավիճակի խաղաղ կարգավորմանը: Այս մասին հայտնում է ՌԻԱ Նովոստին` հղում անելով ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկին։
«Նա ոգևորված է, որ նախագահները համաձայնել են միջոցներ ձեռնարկել բանակցային գործընթացը խորացնելու և շփման գծում լարվածության նվազեցման լրացուցիչ քայլեր ձեռնարկելու համար», — ասել է Դյուժարիկը:
Գուտերեշն ընդգծել է, որ ՄԱԿ-ն աջակցում է ԵԱՀԿ Մինսկի խմբի համանախագահների միջնորդական ջանքերին և կոչ է արել կողմերին բանակցությունների ընթացքում ղարաբաղյան հակամարտության խաղաղ կարգավորման հասնել:
Հայաստանի և Ադրբեջանի նախագահներ Սերժ Սարգսյանն ու Իլհամ Ալիևը երեկ Շվեյցարիայում բանակցություններ են անցկացրել ԵԱՀԿ Մինսկի խմբի համանախագահների նախաձեռնությամբ: Կողմերը համաձայնել են միջոցներ ձեռնարկել հետագա լարվածությունը նվազեցնելու համար, որպեսզի ճակատային գծում զոհեր չլինեն:
