ԵՐԵՎԱՆ, 17 հոկտեմբերի — Sputnik. ՆԱՏՕ-ի խորհրդարանական վեհաժողովում եվրոպական պատվիրակությունների ներկայացուցիչները դժգոհություն են արտահայտել Անկարայի կողմից ռուսական С-400 համակարգերի ձեռքբերման պայմանագրի կապակցությամբ, ասաց հայկական պատվիրակության ղեկավար Կորյուն Նահապետյանը:
«Եվրոպական տարբեր երկրների խորհրդարանականներ խորը մտահոգություն են հայտնել ՆԱՏՕ–ի անդամ Թուրքիայի կողմից ռուսական С-400 համակարգեր գնելու վերաբերյալ, մասնավորապես, անհամաձայնություն են հայտնել Մեծ Բրիտանիայի և Նիդեռլանդների ներկայացուցիչները»,– ասաց Նահապետյանը։
Նրա խոսքով` պատգամավորներն այդ հարցով դիմել են ՆԱՏՕ–ի գլխավոր քարտուղար Յենս Ստոլտենբերգին։
«Նա պատասխանել է, որ Դաշինքի յուրաքանչյուր անդամ ինքն է որոշում, թե ՀՕՊ և ՀՀՊ ինչ համակարգեր գնի իր պաշտպանության համար»,– ասաց Նահապետյանը։
Թուրքիայի նախագահ Ռեջեփ Թայիփ Էրդողանը սեպտեմբերի 12-ին հայտնել էր, որ Անկարան Մոսկվայի հետ С-400 համակարգեր գնելու մասին համաձայնագիր է ստորագրել, կանխավճարն արդեն տված է։ Ռազմատեխնիկական համագործակցության հարցերով ՌԴ նախագահի օգնական Վլադիմիր Կոժինը հաստատել է, որ Ռուսաստանն ու Թուրքիան С-400–ի մատակարարման պայմանագիր են ստորագրել, որը պատրաստվում է կատարման։ Թուրքիայի պաշտպանական արդյունաբերության քարտուղարության պետի տեղակալ Իսմայիլ Դեմիրը հայտարարել էր, որ Թուրքիան С-400 համակարգեր կսկսի ստանալ երկու տարվա ընթացքում։
С-400 «Տրիումֆը» մեծ հեռավորության նորագույն հակաօդային պաշտպանության զենիթահրթիռային համակարգ է։ Այն նախատեսված է ավիացիայի, թևավոր և բալիստիկ, այդ թվում՝ միջին գործողության շառավղով հրթիռների ոչնչացման համար, ինչպես նաև կիրառվում է ցամաքային օբյեկտների դեմ։ С-400-ի հեռավորությունը 400 կիլոմետրի է հասնում, այն կարող է ոչնչացնել մինչև 30 կիլոմետր բարձրության վրա գտնվող թիրախներ: С-400 «Տրիումֆ»–ը համալրել է ռուսական բանակի սպառազինությունը 2007 թվականին։
