ԵՐԵՎԱՆ, 16 Հոկտեմբեր — Sputnik. Հոկտեմբերի 16-ին Սերժ Սարգսյան–Իլհամ Ալիև հանդիպման հիմնական թեման, ինչպես և սպասվում է, արցախյան խնդրի կարգավորումն է լինելու։ Տարեսկզբից անընդհատ հետաձգված հանդիպումը կազմակերպվել է ԵԱՀԿ ՄԽ միջնորդությամբ։
Խոսելով հանդիպումից ունեցած սպասումների մասին` ՀՀԿ փոխնախագահ Արմեն Աշոտյանն ասել էր, որ այս թեժ փուլում այն հնարավորություն կտա վերականգնել բարեհաջող մթնոլորտը, ինչը թույլ կտա ավելի լավատեսորեն նայել ապագային։
Ժնևյան հանդիպումն այս տարվա ընթացքում երկու երկրների ղեկավարների առաջին երկկողմ հանդիպումն է։
Օրեր առաջ, Սարգսյանն ու Ալիևը Սոչիում մասնակցել են ԱՊՀ և ԵԱՏՄ գագաթաժողովներին: Ենթադրվում էր, որ այս գագաթաժողովի շրջանակներում էլ կկայանա սպասված հանդիպումը, բայց այն տեղի չունեցավ։
Բելառուսի նախագահ Լուկաշենկոն ասել էր, որ Սոչիում աշխատանքներն անցել են բավական ուրախ միջավայրում` միմյանց հասցեին կատակելով։
Վերջին անգամ Հայաստանի և Ադրբեջանի նախագահները հանդիպել են 2016 թվականի հունիսին, Սանկտ Պետերբուրգում՝ Ռուսաստանի նախագահ Վլադիմիր Պուտինի մասնակցությամբ:
Կողմերը հանդես են եկել համատեղ հայտարարությամբ, որտեղ ընդգծել էին երկկողմ հավանության արժանացած այն հարցերը, որոնց լուծումը պայմաններ կստեղծի ղարաբաղյան խնդրի կարգավորման համար։
Հանդիպմանը կողմերը վերահաստատել էին հրադադարի հաստատման 1994թ–ին ընդունված և հրադադարի ռեժիմի պահպանման մասի 1995թ–ին ձեռք բերված համաձայնությունները։
Նախագահները նաև համաձայնություն էին ձեռք բերել ԵԱՀԿ ՄԽ շրջանակներում շփման գծի մոնիթորինգի և տեղ գտնող միջադեպերի հետաքննության մեխանիզմերի ներդրման շուրջ։
