ԵՐԵՎԱՆ, 12 հոկտեմբերի — Sputnik. Հայաստանի նախագահ Սերժ Սարգսյանը հաջորդ շաբաթ Ժնևում կհանդիպի Ադրբեջանի նախագահ Իլհամ Ալիևի հետ, այսօր ՀՀԿ ԳՄ նիստից հետո լրագրողներին տեղեկացրեց ՀՀԿ փոխնախագահ Արմեն Աշոտյանը։
«Չնայած Ադրբեջանի բարձրաստիճան պաշտոնյաների վերջին հայտարարություններին, այնուհանդերձ Հայաստանի նախագահը գնալու է Ալիևի հետ հանդիպմանը», — ասաց Աշոտյանը։
Նա պատասխանեց նաև այն հարցին, թե ինչու Սարգսյան-Ալիև հանդիպում չկայացավ Սոչիում։
«Չկայացավ նման հանդիպում, որովհետև ավելի վաղ ծրագրված չէր»,- ասաց Աշոտյանը` նշելով, որ ինտրիգ փնտրելու կարիք չկա։
Սարգսյան-Ալիև հանդիպումը նախաձեռնել են ԵԱՀԿ Մինսկի խմբի համանախագահները։
Նշենք, որ Սարգսյան–Ալիև վերջին հանդիպումը տեղի է ունեցել 2016 թվականի հունիսին Սանկտ Պետերբուրգում։
