ԵՐԵՎԱՆ, 6 հոկտեմբերի — Sputnik. Ռուսաստանի հավաքականի ձյուդոիստ Արսեն Գալստյանը պատմել է, թե ինչու է իր ընտանիքը որոշել Հայաստանից Ռուսաստան տեղափոխվել։ Նա «МК на Кубани»-ին տված հարցազրույցում խոստովանել է, որ Հայաստանում են մնացել եղբայրները, քույրերը, տատիկն ու էլի շատ հարազատներ։
«Այն գյուղը, որտեղ ես ապրում էի, ոչ թե Արցախում է, այլ երկրի հարավ-արևելքում` սահմանի մոտ։ Մեկ կիլոմետր այն կողմ ադրբեջանական գյուղ կա։ Իմ պատմական հայրենիքն առաջին գծում է։ Արկը քանդեց մեր տունը։ Հայրս ընկերներ ուներ Ռուսաստանում, ինքն էլ հաճախ էր այստեղ գալիս, այդ պատճառով որոշեց տեղափոխվել»,- պատմել է Գալստյանը։
Ապագա չեմպիոնի ընտանիքը տեղափոխվեց Ադիգեա, որտեղ էլ հենց սկսեց ձյուդոյով զբաղվել։ Օլիմպիական չեմպիոնը երազում է, որ իր հայրենիքում ամեն ինչ առաջվա պես լինի։
Արսենի խոսքով` այնտեղ, որտեղ ինքն է ծնվել, կյանքն այնքան էլ հեշտ չէ. մարդիկ չեն կարողանում լավ աշխատանք գտնել, դրան գումարվում է նաև հայ-ադրբեջանական սահմանի լարվածությունը։
«Ես երազում եմ, որ ամեն ինչ լինի այնպես, ինչպես պատմում էր պապս, երբ ադրբեջանցիները գալիս էին հայերի հարսանիքներին և հակառակը։ Ես չեմ հավատում, որ այս հակամարտությունը հնարավոր չէ կարգավորել։ Երբ եկա Ռուսաստան և առաջին դասարան գնացի, մեր դասարանում նաև ադրբեջանցիներ կային։ Այստեղ` Ռուսաստանում, մենք շփվում ենք իրար հետ։ Հիմա էլ ադրբեջանցի ընկերներ ունեմ, շատ լավ եմ ճանաչում Ադրբեջանի ձյուդոյի հավաքականի տղաներին` Օրհան Սաֆարովին, Իլհար Մուշկիևին ու մյուսներին»,- ասել է նա։
Մարզիկը նշել է, որ ձյուդոն է իրեն անհատ դարձրել, ծանոթացրել տարբեր մշակույթների ու ազգությունների մարդկանց հետ, աշխարհ դուրս գալու հնարավորություն տվել։ Ձյուդոյի շնորհիվ այսօր նա կարողանում է վստահ առաջ գնալ ու չվախենալ դժվարություններից։
