ԵՐԵՎԱՆ, 6 հոկտեմբերի — Sputnik. Ռուսաստանի և Հայաստանի մարզերի միջև անհրաժեշտ է նոր նախագծեր իրականացնել, գրված է Ռուսաստանի նախագահ Վլադիմիր Պուտինի` հայ-ռուսական վեցերորդ միջտարածաշրջանային համաժողովի բացման ուղերձում:
«Մարզերի արդյունավետ կապը մեր համագործակցության, տնտեսական, կրթական և մշակութային գործակցության համար արդյունավետ հիմք է։ Կարևոր է զարգացնել Ռուսաստանի և Հայաստանի մարզերի միջև երկխոսությունը, այն համալրել համատեղ նախագծերով, անդադար բարձրացնել գործնական փոխգործակցության մակարդակը»,– գրված է համաժողովի մասնակիցներին ուղղված Պուտինի ուղերձում, որն ընթերցել է արտասահմանյան երկրների հետ միջտարածաշրջանային և մշակութային կապերի ՌԴ նախագահի վարչության պետ Վլադիմիր Չերնովը։
Պուտինի կարծիքով` այս հարցում կարևոր է օգտագործել նման համաժողովների ստեղծագործական ներուժը։
Ռուսաստանի նախագահը հույս ունի, որ քննարկման արդյունքում կոնկրետ առաջարկներ կմշակվեն, որոնք կնպաստեն Ռուսաստանի և Հայաստանի միջև վստահության, փոխըմբռնման և բարիդրացիական հարաբերությունների հետագա ամրապնդմանը։
Չերնովն իր հերթին նշեց, որ հայ և ռուս ժողովուրդների միջև հարաբերությունները բառի բուն իմաստով եղբայրական և դաշնակցական բնույթ են ստացել։
«Եվրասիական միության, ինչպես նաև ՀԱՊԿ, ԱՊՀ շրջանակներում տարբեր ձևաչափերով ամրապնդվում է մեր երկրների գործընկերությունը», – ասել է Չերնովը։
Նրա խոսքով` կողմերը խորացնում են տնտեսական և ռազմական համագործակցությունը։
