ԵՐԵՎԱՆ, 4 հոկտեմբերի — Sputnik. Շենգավիթի վարչական շրջանի քննչական բաժնում ձեռնարկվում են ակտիվ քննչական և դատավարական այլ գործողություններ՝ պարզելու 48-ամյա Սամվել Ավագյանի մահվան հանգամանքները, հաղորդում է քննչական կոմիտեն։
Հոկտեմբերի 3-ին «Էրեբունի» բժշկական կենտրոնից ահազանգ է ստացվել առ այն, որ որովայնի հրազենային վնասում, ներորովայնային սուր արյունահոսություն, հեմոռագիկ շոկ ախտորոշմամբ Երևան քաղաքի Նորագավիթ թաղամասի 8-րդ փողոցից բժշկական կենտրոն է տեղափոխվել Երևան քաղաքի Նորագավիթի բնակիչ, 1969 թ. ծնված Սամվել Ավագյանը:
Դեպքի առթիվ նույն օրը քննչական կոմիտեի Շենգավիթի վարչական շրջանի քննչական բաժնում հարուցվել է քրեական գործ։
Սամվել Ավագյանը ճանաչվել է որպես տուժող, սակայն ի վիճակի չի եղել ցուցմունք տալ:
Կատարվել է դեպքի վայրի զննություն, որի ընթացքում դիտարկվող հասցեում գտնվող տաղավարում առկա սեղանի և հարակից պատի վրա հայտնաբերվել են հրազենային վնասվածքի նմանվող հետքեր:
Հարցաքննվել է երկու տասնյակից ավել անձիք: Քրեական գործով նշանակվել են դատաձգաբանական և դատաքիմիական համալիր և դատաբժշկական փորձաքննություններ:
Այսօր ժամը 06:30-ին «Էրեբունի» բժշկական կենտրոնից տեղեկացրել են, որ Ս.Ավագյանը, գիտակցության չգալով, մահացել է:
