ԵՐԵՎԱՆ, 2 հոկտեմբերի – Sputnik. Այսօր «Արմենիա» բժշկական կենտրոնում տեղի ունեցած միջադեպի վերաբերյալ նոր մանրամասներ են ի հայտ եկել։ ՀՀ քննչական կոմիտեից Sputnik Արմենիային հայտնեցին, որ նախնական տվյալներով` «Արմենիա» բժշկական կենտրոնում կրակոցներ են հնչել այն հիվանդասենյակում, որտեղ այսօր քրեակատարողական հիմնարկից տեղափոխվել է կալանավորված անձը` բուժում ստանալու նպատակով։
Sputnik Արմենիայի տեղեկություններով` կալանավորը «Բանդայի» գործով անազատության մեջ գտնվող Դավիթ Գալստյանն է։
Ի դեպ, քննչական կոմիտեից հայտնեցին նաև, որ քրեակատարողական հիմնարկի աշխատակիցների և ոստիկանության ջանքերով թե՛ կալանավորը, թե՛ կրակոցներ արձակած անձը վնասազերծվել են։
Մեզ հայտնի դարձավ նաև, որ կալանավորը ևս այդ պահին զինված է եղել։ Նրան հաջողվել է ՔԿՀ-ի աշխատակիցներից մեկից խլել նրան պատկանող ծառայողական զենքը։
Կրակոցներ արձակելով կալանավորը փորձել է փախուստի դիմել հիվանդանոցից, բայց դա նրան չի հաջողվել։
Իրավապահ մարմինները հայտնում են, որ դեպքի հանգամանքները պարզվում են, ընթանում է քննություն։
Ըստ ոստիկանության` զինված անձը վնասազերծվել է ու բերման ենթարկվել ոստիկանության բաժին: Տուժածներ չկան:
