ԵՐԵՎԱՆ, 2 հոկտեմբերի — Sputnik. Այսօր միջադեպ է տեղի ունեցել «Արմենիա» բժշկական կենտրոնում: Հրազենով զինված անձը մտել է հիվանդանոց և կրակոցներ արձակել: Sputnik Արմենիայի հետ զրույցում այս մասին ասաց ՀՀ ոստիկանության լրատվական ծառայության ԶԼՄ-ների հետ կապի բաժնի պետ Էդգար Ջանոյանը
Հիշյալ անձը վնասազերծվել ու բերման է ենթարկվել ոստիկանության բաժին:
Տուժածներ չկան: Հանգամանքները պարզվում են:
Կատարվում է նախաքննություն:
ԶԼՄ-ները հայտնում են, որ ժամը 16։20-ի սահմաններում ինքնաձիգով զինված քաղաքացին ներս է մտել «Արմենիա» բժշկական կենտրոնի անոթային բաժանմունք, որտեղ բուժում է ստանում կալանավորված մի քաղաքացի։
Տղամարդն ինքնաձիգը հիվանդանոց է մտցրել պայուսակի մեջ թաքցրած, 3-րդ հարկի հիվանդասենյակներից մեկում ոչ թիրախային անկանոն կրակոցներ է արձակել։
Կալանավորին հսկող ոստիկանները կարողացել են վնասազերծել կրակոցներ արձակողին, սակայն նա դիմել է փախուստի։ Shamshyan.com-ի տեղեկություններով՝ նրա փախուստը կանխել են հիվանդանոցում ծառայություն կատարող Ոստիկանության ծառայողներն ու «Բրիգադ» անվտանգության ծառայության աշխատակիցները։
