ԵՐԵՎԱՆ, 28 սեպտեմբերի — Sputnik. Հայաստանի տարեց քաղաքացիները պետք է հնարավորություն ստանան աշխատելու։ Վարչապետ Կարապետյանն այսօր կառավարության նիստում աշխատանքի և սոցիալական հարցերի նախարարին հանձնարարեց քննարկել և առաջարկություն ներկայացնել տարեցներին աշխատաշուկա ընդգրկելու վերաբերյալ, ապահովել նրանց սոցիալական պաշտպանությունը։
Հանձնարարականը, ինչպես նշեց վարչապետը, կապված է հոկտեմբերի 1-ին ՄԱԿ-ի հռչակած տարեցների միջազգային օրվա հետ։
Երկրորդ հանձնարարությունը դարձյալ սոցիալական ոլորտից էր։ Կարապետյանը հանձնարարեց բարելավել երեխայի ծննդյան նպաստի տրամադրման առցանց համակարգը։
«2017 թվականի սկզբից գործարկվել է երեխայի ծննդյան միանվագ նպաստի առցանց դիմումի համակարգը, որը հնարավորություն է տալիս 1-ին և 2-րդ երեխայի ծննդյան դեպքում միանվագ նպաստը ստանալ առցանց եղանակով ներկայացված դիմումի հիման վրա։ Նշված համակարգից արդեն իսկ օգտվել է շուրջ 15,000 մարդ:
Իրականացված ուսումնասիրությունների արդյունքում պարզ է դարձել, որ առկա են խնդիրներ կենսաթոշակների և նպաստների անկանխիկ վճարման գործընթացում»,- ասաց վարչապետը և հանձնարարեց պարզեցնել պետական մարմինների ու բանկերի միջև տեղեկատվության փոխանակման համակարգը։
Վարչապետի վերջին հանձնարարությունն ուղղված էր ՋՏՊԿ նախագահին ու բնապահպանության նախարարին։
Կարեն Կարապետյանն անդրադարձավ ջրամբարների թերլցվածության խնդրին՝ պատճառների թվում նշելով ջրամբարները սնուցող գետերի հուների աղտոտվածությունը։
Խնդիրը լուծելու համար Բնապահպանության նախարարին և Ջրային տնտեսության պետական կոմիտեի նախագահին հանձնարարվեց մեկշաբաթյա ժամկետում կառավարության աշխատակազմ ներկայացնել ջրամբարները սնող ջրահոսքերի հուների մաքրման աշխատանքների կատարման վերաբերյալ առաջարկություն և գործողությունների ծրագիր:
«Բնապահպանության նախարարությանը խնդրում եմ հատուկ ուշադրություն դարձնել այս հանձնարարականի վրա»,- ասաց Կարեն Կարապետյանը՝ հիշեցնելով ջրամբարներում այս տարի ամռանը ստեղծված բնապահպանական ծանր իրավիճակը։
