ԵՐԵՎԱՆ, 26 սեպտեմբերի — Sputnik, Դիանան Հարությունյան. Կանայք՝ իրենց լավագույն հագուստներով, երեխաները կոկիկ ու տոնական շորերով, փողոցներում ազգային երգու պար: Իրաքյան Քրդստանում անկախության հանրաքվեի օրը հյուրերին ամենաշատը սա էր տպավորել:
Հայաստանի դեմոկրատական կուսակցության ղեկավար Արամ Սարգսյանին Էրբիլ էր հրավիրել իշխող՝ Քրդստանի դեմոկրատական կուսակցությունը: Ողջ օրը դիտարկելով հանրաքվեն ու հետո նաև` արդյունքների հրապարակումը` նա հիմնական մեկ դիտարկում ունի՝ այս մարդին իսկապես ձգտում են անկախության, ձգտում են միասնաբար, առանց վարանելու:
«Սա մանդատ էր իշխանություններին` իրականացնելու ժողովրդի երազանքը: Հավանաբար, Էրբլիլը կդիմի ՄԱԿ-ին, որ ամբողջ այս գործընթացը լեգիտիմացվի: Դե ֆակտո հիմա Իրաքյան Քրդստանը պետություն է»,- Sputnik Արմենիայի հետ զրույցում ասում է Սարգսյանը:
Պաշտոնական Բաղդադն արդեն հայտարարել է, որ չի ճանաչում Իրաքյան Քրդստանի անկախության մասին հանրաքվեի արդյունքը և դրա վերաբերյալ բանակցություններ չի վարելու տարածաշրջանային կառավարության հետ: Ավելին, այստեղ արդեն հայտարարում են, որ պատրաստ են չեղարկել Իրաքյան Քրդստանի բնակիչների անձնագրերը՝ փաստացի կտրելով նրանց կապն արտաքին աշխարհի հետ: Ըստ Արամ Սարգսյանի՝ Էրբիլը Իրաքի կառավարության հետ պատրաստ է բանակցությունների, որ ցնցումներ չլինեն: Եթե չստացվեց՝ խնդիրը կսկսեն լուծել փուլային տարբերակով: Սարգսյանի կարծիքով`ազգերի ինքնորոշման իրավունքն իրացնելու իմաստով, պաշտոնական հանդիպումներում, քրդերի համար հետաքրքիր է Արցախի օրինակը: Քաղաքական գործիչը չի բացառում՝ Արցախի համար էլ կարող է նախադեպային լինել Իրաքի Քրդստանի անկախացումը:
«Իհարկե, կան զուգադիպություններ: Արցախի դեպքում, սակայն, կա Մայր հայրենիք` ճանաչված պետություն, որի միջոցով նաև Արցախը հարաբերվում է արտաքին աշխարհի հետ: Քրդստանը դեռ նաև այդ խնդիրը պիտի լուծի: Բայց եթե լուծվեց, եթե Քրդստանն ինքնորոշվելով հռչակի անկախություն, միանշանակ կարելի է հիշեցնել աշխարհին, որ Արցախն անկախ է հռչակվել դեռ 1991-ին»,- մեզ հետ զրույցում նշում է Դեմկուսի առաջնորդը:
Ինչ վերաբերում է թուրքերին ու Էրդողանի պատերազմի սպառնալիքներին, Սարգսյանի տպավորությամբ` պաշտոնական Էրբիլը դրանք այդքան էլ լուրջ չի ընդունում: Ամուր ու խորն են տնտեսական շահերը՝ Թուրքիան, օրինակ, հենց քրդերից է գնում էժան նավթը: Ավելին, եթե այնուամենայնիվ, այդ երկիրը գնա սրացման ճանապարհով, ապա մեծ նվեր կանի քրդերին՝ միավորելով նրանց ու Թուրքիայի քրդերին:
«Պաշտոնական հանդիպումներից մեկի ժամանակ հարցրի՝ հիմա ինչ, որ Անկախությունը հռչակեցիք, հանելո՞ւ եք Իրաքի դրոշները: Պատասխանը միանշանակ էր՝ չենք հանելու, պետության հետ հակամարտության Էրբիլը չի ուզում գնալ: Նրանք միայն ուզում են ապրել անկախ ու սեփական երկրում»,-սա էր հայ քաղաքական գործչի հայացքը ներսից տարածաշրջանի կարևոր իրադարձություններից մեկին:
