ԵՐԵՎԱՆ, 26 սեպտեմբերի — Sputnik. Բաղդադը չի ճանաչում Իրաքյան Քրդստանի անկախության մասին հանրաքվեի արդյունքը և դրա վերաբերյալ բանակցություններ չի վարելու տարածաշրջանային կառավարության հետ, հայտնում է ՌԻԱ Նովոստին` հղում անելով Իրաքի վարչապետ Հայդեր ալ Աբադիին, որի խոսքերն է մեջբերում Ռոյթերսը։
«Մենք պատրաստ չենք քննարկել կամ երկխոսություն վարել հանրաքվեի արդյունքի վերաբերյալ, քանի որ դա հակասահմանադրական է»,– ասել է ալ Աբադին։
Երկրի հյուսիսում բնակվող քրդերը սեպտեմբերի 25-ին կողմ քվեարկեցին իրենց անկախություն շնորհելու համար։ Քվեարկությունը մեկնարկեց տեղի ժամանակով ժամը 8-ին և պետք է ավարտվեր 18:00–ին։ Ավելի ուշ հայտնի դարձավ, որ Քրդստանի Բարձրագույն անկախ հանձնաժողովը, որը պատասխանատու էր հանրաքվեի անցկացման համար, երկարաձգել էր որոշ տեղամասերի աշխատանքը մինչև ժամը 19:00–ը, քանի որ որոշ դժվարամատչելի շրջաններում մարդիկ չէին հասցրել քվեարկել։
Հանրաքվեին մասնակցեց տեղի բնակչության 80%։ Նախնական տվյալների համաձայն` մեծամասնությունը անկախությանը կողմ է քվեարկել։
Բարձրագույն անկախ հանձնաժողովի տվյալներով` ընտրություններին ձայնի իրավունք ուներ 5,2 մլն մարդ։ Բացվել էր 6846 ընտրատեղամաս և գործում էր 1737 հանձնաժողով։ Քվեարկությանը մասնակցեցին ոչ միայն Էրբիլի, Սուլեյմանիայի և Դոհուկի նահանգները, որոնք պաշտոնապես մտնում են քրդական ինքնավարության կազմի մեջ, այլև նրա սահմաններից դուրս գտնվող շրջանները, մասնավորապես, Քիրքուկ, Նայնավա, Սալահ ադ Դին գավառները։ Բացի այդ, ձայներ էին ստացվում առցանց քվեարկության միջոցով Իրաքի սահմաններից դուրս բնակվող քրդերից։
Հանրաքվեի պաշտոնական արդյունքը հայտնի կդառնան 72 ժամվա ընթացքում։
Իրաքն ու Թուրքիան քվեարկության ավարտին լայնածավալ զորավարժություններ սկսեցին։ Ավելին, Թուրքիայի նախագահը սպառնում է ռազմական ինտերվենցիայով, նշելով, որ Անկարան չի ընդունում քրդական պետությունը։ Իրանը կոչ էր արել Էրբիլի իշխանություններին չեղյալ հայտարարել հանրաքվեն, հայտարարելով, որ դա կարող է ապակայունացնել իրավիճակը տարածաշրջանում։ Հանրաքվեի անցկացումը լուրջ քննադատել էին գրեթե բոլոր համաշխարհային և տարածաշրջանային տերությունները։
