ԵՐԵՎԱՆ, 25 Սեպտեմբեր — Sputnik. ROSATOM TVEL վառելիքային ընկերությունը ԵՊՀ–ում այսօր անցկացրեց «TVEL-ը որպես էներգիայի ստեղծման արվեստ» գեղարվեստա-արդյունաբերական ցուցահանդեսը։
«TVEL-ը որպես էներգիայի ստեղծման արվեստ» գեղարվեստա-արդյունաբերական ցուցահանդեսը TVEL վառելիքային ընկերության արտ-նախագիծն է, որի առաքելությունն է բացահայտել միջուկային վառելիքի արտադրության գործընթացների և տեխնոլոգիաների, աշխատակազմի, սարքավորումների, գործիքների և նյութերի ներդաշնակության էսթետիկական կողմը։
Նախագծում համաշխարհային արվեստի գլուխգործոցներ են կիրառվել` միջուկային վառելիքի ցիկլի և դասական գեղարվեստական պատկերների միջև անկրկնելի վիզուալ ասոցիացիաներ ստեղծելու համար։
«Համաշխարհային արվեստի, ճարտարապետության, նկարչության լավագույն նմուշների հետ ասոցիատիվ զուգահեռներ տանելու միջոցով ուսանողները հասկանում են, որ մեր տեխնոլոգիաները արդյունաբերական արտադրանքի պսակն են», – Sputnik Արմենիային ասաց ROSATOM TVEL վառելիքային ընկերության փոխնախագահ Կոնստանտին Սոկոլովը։
Բացի ցուցահանդեսից, ԵՊՀ–ում դասախոսություն ներկայացվեց ատոմային էներգետիկայի ոլորտում հայ–ռուսական համագործակցության մասին։
«Մեր առաքելությունն առաջին հերթին մարդասիրական համագործակցությունն է։ Ուզում ենք փոխանցել մեր գիտելիքներն եկող սերնդին, այս պարագայում` ֆիզիկայի ֆակուլտետի ուսանողներին, որոնք ընտրել են ռեակտորների սպասարկումն ու միջուկային ֆիզիկայի ոլորտը», – ասաց Սոկոլովը։
Այս դասախոսությունը, նրա խոսքով, ուղղված է ատոմային էներգետիկայի հանրահռչակմանը։ Այն պատմում է աշխարհում ռուսական միջուկային էներգետիկայի դերի, ինչպես նաև այդ ոլորտում հայ-ռուսական համագործակցության մասին։
Նա հիշեցրեց, որ հայ ուսանողների համար քվոտավորման համակարգ է գործում մի շարք ռուսական համալսարաններում, որոնք առնչություն ունեն ֆիզիկա առարկայի հետ։
ROSATOM TVEL ընկերության մասնագետների կողմից ԵՊՀ–ում անցկացված դասախոսությունը ուսանողներին մանրամասն ծանոթացրեց միջուկային վառելիքի արտադրման և շահագործման թեմայի հետ, վառելիքի, որի մատակարարումը Մեծամորի ԱԷԿ էլեկտրաէներգետիկայի ոլորտում ռուս-հայկական համագործակցության հիմքն է։
Բացի այդ, բացված «Миру – МИР» հաղորդակցման հարթակի հիման վրա նախատեսվում է միջազգային ցանցային ուսանողական միություն ստեղծել, որի առաքելությունը կլինի ատոմային էներգետիկայի և արդյունաբերության ոլորտում ֆունդամենտալ հիմքերի և կիրառական գիտելիքների հանրահռչակումը։ Այս նախաձեռնության շրջանակներում առաջին հենակետային բուհերը կլինեն ԵՊՀ–ն և ՌԴ ԱԳՆ ՄՀՄՊՀ էներգետիկ քաղաքականության և դիվանագիտության միջազգային ինստիտուտը։
«ՏՎԷԼ» վառելիքային ընկերության պատվիրակության աշխատանքային այցը Երևան` փոխնախագահ Կոնստանտին Սոկոլովի գլխավորությամբ, ևս մեկ քայլ է գիտակրթական ոլորտում Հայաստանի հետ Ռոսատոմի համագործակցության զարգացման համար, որն արդեն ի քանի տարի է ինչ ակտիվորեն զարգանում է։ Հայ դպրոցականների և ուսանողների համար շնորհանդեսներ, դասախոսություններ, օլիմպիադաներ կանցկացվեն, դրանցում հաղթածները հնարավորություն կստանան շարունակելու ուսումը Մոսկվայում «ՄԻՖԻ» ազգային հետազոտական միջուկային համալսարանի մագիստրատուրայում։
