ԵՐԵՎԱՆ, 27 նոյեմբերի — Sputnik. Կիրակի 87 տարեկան հասակում մահացել է հայտնի գիտնական, «Ռոսատոմ» պետական ձեռնարկության գիտատեխնիկական խորհրդի նախագահ, ակադեմիկոս Նիկոլայ Լավերովը:
Լավերովը երկրաբանության, ուրանի երկրաքիմիայի, օգտակար հանածոների որոնումների, հետախուզության և յուրացման ոլորտում ճանաչված ռուս գիտնական էր: Նա մեծ ներդրում է ունեցել միջուկային և ածխաջրածնային էներգետիկայի համար վառելիքային ռեսուրսների ուսումնասիրման մեջ, առաջիններից մեկը` հետազոտություններ է կատարել ռուսական Արկտիկայի երկրաբանության, կենսաէկոլոգիայի և տիեզերքից Երկրի ուսումնասիրման բնագավառներում:
1988-89 թվականներին Լավերովը գլխավորել է Սպիտակի երկրաշարժի հետևանքները վերացնող կառավարական հանձնաժողովի գիտական խումբը: Նա իր աշխատանքներում ոչ միայն հիմնավորել է հայկական ԱԷԿ-ի անվտանգությունը, այլև Հայաստանի տարածքում ԱԷԿ նոր բլոկերի կառուցման հնարավորությունը: Ռուսաստանի տարածքում երկրաշարժերի կանխատեսումների որակի բարձրացման համար ԳԱԱ-ում Լավերովի գլխավորությամբ ստեղծվել է աշխարհում ամենալավ սեյսմիկ դիտարկումների համակարգը, որը սերտորեն համագործակցում է ԱԻՆ-ի հետ:
Լավերովի գիտական մշակումները գործնական կիրառում են ստացել ոչ միայն ատոմային արդյունաբերության, այլև Ռուսաստանի պաշտպանունակության ամրապնդման խնդրի լուծման մեջ:
Լավերովը տարբեր տարիների մի շարք պարգևների է արժանացել, այդ թվում` ԳԱԱ բարձրագույն պարգևի` Լոմոնոսովի անվան Մեծ ոսկե մեդալի: Նա «Հայրենիքի առջև ունեցած վաստակի» շքանշանի ասպետ է:
