ԵՐԵՎԱՆ, 25 սեպտեմբերի — Sputnik. Ռուսաստանցի բլոգեր Սերգեյ Նովիկովը LiveJournal–ի իր էջում պատմել է Հայաստան և Արցախ իր ուղևորության, ինչպես նաև Ադրբեջանի «սև ցուցակում» հայտնվելու հավանականության մասին։
««Բարի գալուստ ազատ Արցախ»։ Հայաստանից Արցախ մտնելիս նման գրառումով պաստառ է ձեզ դիմավորում։ Լուսարձակները միացնում ու լուսանկարում ենք գտածոն։ Հեռվում` խորդուբորդ կածանով լեռնանցքում, վառվում են դեռ 25 տարի առաջ Լաչին կոչվող քաղաքի լույսերը։ Արցախը, պատերազմի արդյունքում, որը 94 թվականի մայիսին ավարտվեց հաշտության կնքումով, Երևանի ռազմավարական ճանապարհի հետ մեկտեղ անցավ հայերի հսկողության տակ։
Այդ օրվանից Լաչինը դարձավ Բերձոր, խաչով մեծ վանք ունեցավ, ամբողջությամբ փոխեց իր էթնիկ կազմն ու դարձավ Արցախի հանրապետության` դե ֆակտո այսօրվա երկրորդ հայկական պետության խոշորագույն քաղաքներից մեկը», – գրում է բլոգերը։
Նրա հետ Արցախ են այցելել Ռուսաստանում, Հայաստանում, Լատվիայում և Լիտվայում ծնված ևս չորս ճանապարհորդ–լրագրող և բլոգեր։
Նրա խոսքով` համատեղ ուժերով ծնվեց նաև, այդ ողջ «անկարգությունը» տեղեկատվական տիրույթում միավորող blacklistparty2017 հեշթեգը։
«Նրանց համար, ովքեր տեղյակ են, թե ուր ենք մենք գնում, կարճ և հստակ գրված է, պարզաբանելու կարիք չկա», – գրում է Նովիկովը։
Նա պատմում է Հայաստանից և Արցախից վերադառնալու ճանապարհի, կանգառների և երկրի տեսարժան վայրերի մասին ։
«Մենք Ստեփանակերտում ենք, Անդրկովկասում ամենա «գոյություն չունեցող» հանրապետության մայրաքաղաքում։ Այն ժամանակ, երբ տարածաշրջանային հարևանները` Աբխազիան և Հարավային Օսեթիան, գոնե նվազագույն միջազգային ճանաչում ստացան, Արցախը ՄԱԿ–ում ներկայացված և ոչ մի երկիր չի «ճանաչում»։ Նույնիսկ` Հայաստանը, առանց որի Արցախի անկախությունը Բաքվից հնարավոր չէր լինի», – գրում է բլոգերը։
Նրա խոսքով` յուրաքանչյուր կիլոմետրը դեպի Արևելք` ավելի հավանական է դարձնում հարևան պետության «սև ցուցակում» հայտնվելը։
«Բայց ոչինչ, այդպես էլ են ապրում։ Շուրջ 70 մարդուց բաղկացած այդ ցուցակում է հայտնվել նաև իմ ընկերը` Չերնիգովից ճանապարհորդ Ալեքսանդր Վոլոշյուկը, լավագույն ռուս զբոսավար Դմիտրի Եգորովը և մեր շրջագայության ընկերներից մեկը` Լատվիայից ժամանած բլոգեր Ալեքսանդր Ալիմովը… իսկ ավելի վաղ` ոչ ավել, ոչ պակաս Մոնսերատ Կաբալյեն։ Դա արդեն բավականին արժանավոր ընկերակցություն է։ Քաղաքականությունը քաղաքականություն, բայց ճանապարհորդությունը պետք է շարունակվի, որքան էլ սա միամիտ չհնչի»,– գրում է Նովիկովը։
Այլ կերպ, նրա խոսքով, հնարավոր չէ։
Հիշեցնենք, որ Արցախ այցելած բլոգեր Ալեքսանդր Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։ Ադրբեջանի նախագահի հրամանով նրան ներում շնորհվեց սեպտեմբերի 11-ին ։
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան «սև ցուցակի» մեջ էր ընդգրկել առանց Բաքվի համաձայնության Արցախի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին:
