ԵՐԵՎԱՆ, 25 Սեպտեմբեր — Sputnik. Արցախ այցելելու համար Ադրբեջանում դատապարտված, այնուհետև ներման արժանացած բլոգեր Ալեքսանդր Լապշինն այս պահին Իսրայելում է։ Ադրբեջանական բանտում անցկացրած ժամանակահատվածից հետո նա բժշկական և հոգեբանական հետազոտություն է անցնում «կիսապարտադիր» կարգով։ Այս մասին հայտնում է բլոգերը Livejournal-ի իր էջում։
«Ինձ պետք է հետազոտի հոգեբույժը, հետո պետք է արյան անալիզներ հանձնեմ, այնուհետև ՄՌՏ, քիթ-կոկորդի բժիշկ, վիրաբույժ, նյարդաբան։ Տուբերկուլյոզի ստուգում պետք է անցնեմ։ Սա պայմանավորված է այն հանգամանքով, որ իմ դեպքը հավասարազոր էր մուսուլմանական երկրում գերության մեջ լինելուն, որտեղ ոչ մի նորմ ու կանոն չի պահպանվում», — գրել է Լապշինը։
Նա նշում է, որ բռնության հետքերն ակնհայտ են, և Իսրայելում ուզում են, որ նա հասարակություն վերադառնալուց առաջ, այսպես կոչված, «կարանտին» անցնի։ Բժիշկներն ուզում են համոզվել, որ նրա հոգեբանական և ֆիզիոլոգիական վիճակը կայուն է։
Բլոգերը երկար ժամանակ մենակ է եղել փակ տարածքում և այժմ աստիճանաբար վերականգնում է ֆիզիկական վիճակը, ընտելանում մարդկանցով շրջապատված լինելուն։
«Առաջին օրերին խուսափում էի քայլող մարդկանցից, ռեստորանի աղմուկից և բարձր երաժշտությունից։ Բանտախցում հետ էի վարժվել այդ ամենից։ Սկզբում շրջանցում էի հավաքված մարդկանց, հիմա սովորել եմ, ավելի շուտ, ստիպել եմ ինձ չխուսափել մարդկանցից, այլ միաձուլվել քայլող մարդկանց հոսքին», — հայտնել է Լապշինը։
Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։ Ադրբեջանի նախագահի հրամանով նրան ներում շնորհվեց սեպտեմբերի 11-ին ։
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան "սև ցուցակի" մեջ էր ընդգրկել առանց Բաքվի համաձայնության Արցախի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին:
