Դիանա Հարությունյան, Sputnik
Ադրբեջանական փողի ուժը հայ փաստաբանները դեռ Գուրգեն Մարգարյանի սպանության գործով դատավարությանն էին զգացել: Հայկական կողմի շահերը ներկայացնող Նազելի Վարդանյանը, կարդալով ադրբեջանական լվացքատան հետաքննությունը, բնավ չի զարմացել: Մեզ հետ զրույցում նա պնդում է՝ այո, ենթադրելի էր այդ ամենը:
Դեռ 2012 թվի օգոստոսին մամուլում եղան հրապարակումներ այն մասին, որ Ադրբեջանը խոստացել է գնել 3 մլրդ եվրոյի պարտատոմս: Հիմա էլ տեղեկություններ կան փոխանցված 7 մլն դոլարի մասին: Ժամանակահատվածը համընկնում է,այդ գումարները կարող էին Սաֆարովի արտահանաձնման համար լինել:
«Այն, որ առանց գումարի չէին կարող կազմակերպել արտահանձնումը, փաստ է: 8 տարվա ընթացքում ադրբեջանցիներն ամեն բան արեցին,որ արտահանձնումը կազմակերպեն, չէր ստացվում: Փոխվեց իշխանությունը և նպատակները փողով իրականացնելը հեշտացավ: Դեռ դատավարության ընթացքում պարզ դարձավ՝ ահռելի գումարներ էին ծախսվում: 6 փորձագետի գնեցին Սաֆարովին անմեղսունակ հայտարարելու համար»-, հիշում է Նազելի Վարդանյանը:
Ռամիլ Սաֆարովը և Գուրգեն Մարգարյանը մասնակցել են Բուդապեշտում ՆԱՏՕ-ի հովանավորած անգլերենի դասընթացների: 2004 թվականի փետրվարի 19-ին Սաֆարովը կացնահարելով սպանել է հայ սպային: 2006 թվականի ապրիլին Բուդապեշտի դատարանը Սաֆարովին մեղավոր է ճանաչել և դատապարտել ցմահ բանտարկության՝ 30 տարի անց պայմանական ազատ արձակման հնարավորությամբ:
Սաֆարովն առաջին հարցաքննության ժամանակ իր արարքի պատճառներն այսպես է բացատրել. «Ես ափսոսում եմ, որ ոչ մի հայի միջև այժմ չեմ սպանել… Բանակն ինձ գործուղեց այս դասընթացներին և այստեղ ես իմացա, որ մեզ հետ դասընթացներում նաև երկու հայ կա: Ասեմ, որ իմ մեջ ատելություն ծագեց հայերի հանդեպ: Սկզբում բարևում էինք, այսինքն` նրանք էին բարևում, սակայն ես չէի պատասխանում: Սպանության պատճառն այն է, որ նրանք անցան մեր մոտով և ժպտացին մեր երեսին: Այդ պահին ես որոշեցի սպանել նրանց, այսինքն՝ լուսադեմին կտրել նրանց գլուխները»:
Չնայած այդպիսի խոստովանությանը, նշանակված երեք փորձաքննություններից երկուսով Սաֆարովը մասնակի մեղսունակ, հետո բոլորովին անմեղսունակ ճանաչվեց: Մեղսունակ նրան առաջին փորձաքննությունն էր ճանաչել և վերջինը՝ չորրորդը, որի անցկացումը պնդել էր փաստաբան Նազելի Վարդանյանը: Դատարանում կաշառված 6 փորձագետները չեն պատասխանել դատարանի և ոչ մի հարցի՝ այդպիսով ապացուցելով, թե հանուն ինչի են հարվածի տակ դրել իրենց հեղինակությունն ու կարիերան:
«Սաֆարովի արտահանձնմանը նրանք հասան երկու նպատակի համար. նախ՝ ապացուցելու, որ փողով ամեն բան հնարավոր է գնել և հետո՝ իրենց ժողովրդի, երիտասարդության ոգին բարձրացնելու համար»,- նկատում է փաստաբանը:
2012 թվականի օգոստոսին Հունգարիայի արդարադատության նախարարությունը թույլ է տվել Սաֆարովին տեղափոխել Ադրբեջան, և օգոստոսի 31-ին Ադրբեջան տեղափոխվելուց մի քանի ժամ անց Սաֆարովին ներում է շնորհել Ադրբեջանի նախագահը, նա ազատ է արձակվել: Նրան շնորհվել է ութ տարվա աշխատավարձ և բնակարան, ինչպես նաև բարձրացվել է նրա ծառայողական աստիճանը:
