ԵՐԵՎԱՆ, 5 սեպտեմբերի — Sputnik, Գոհար Սարգսյան. Ծանրամարտիկ Վահրամ Խուդոյանն իր առջև խնդիր դրեց տարիների դադարից հետո կրկին մարզվել ու մասնակցել միջազգային մրցաշարերի։ Դա նրա մոտ հաջող ստացվեց։ Դեռևս ամիսներ առաջ Նոր Զելանդիայի Օքլենդ քաղաքում անցկացվող «World Masters Games»-ին նա ոսկե մեդալ շահեց և ծածանեց եռագույնը։
Օրեր առաջ էլ վերադարձել է Շվեդիայից։ Այնտեղ մասնակցում էր Եվրոպայի բաց առաջնությանը։ Չնայած պետական որևէ հովանավորչության բացակայությանը` ծանրամարտիկը համարձակորեն ասում է` պարապմունքներն ու ելույթները պետք է լինեն շարունակական։
«Շվեդիայում ես գրավեցի 3-րդ տեղը, պատրաստ էի, պարզապես վատառողջ էի մրցման օրը։ Խոսք եմ տալիս, որ մյուս մրցումներին էլ կմասնակցեմ և անպայման հետ կբերենք մեր դիրքերը»,- ասաց 62-ամյա մարզիկը։
Վահրամ Խուդոյանը պատմեց, որ հանդիպումներ է ունեցել սպորտի և երիտասարդության փոխնախարարի հետ, առայժմ ֆինանսավորում չի նախատեսվում վետերան մարզիկների համար։ Սա այն դեպքում, երբ հարևան երկրների ներկայացուցիչները Նոր Զելանդիայի ու Շվեդիայի մրցաշարերին ներկայացել են մեծ պատվիրակություններով` պետության հովանու ներքո։
«Լավ կլիներ, որ սպորտի պատասխանատուները յուրովի մոտեցում ցուցաբերեին այն մարդկանց նկատմամբ, որոնք Հայաստանի պատիվն են պահում միջազգային հարթակներում, ինչ-որ ձևով փորձեին աջակցել, ինչ-որ մեխանիզմներ սահմանեին»,-ասաց նա։
Այս պահին Վահրամ Խուդոյանն ապագայի բազմաթիվ նպատակներ ունի։ Ծրագրում է մասնակցել Հունգարիայում և Իսպանիայում նախատեսված աշխարհի և Եվրոպայի առաջնություններին։ Ավելի քրտնաջան աշխատելու դեպքում էլ նպատակադրել է ռեկորդ սահմանել։ Իսկ մանրամասների մասին կխոսի, երբ խոսքը գործի վերածի։
Ամեն անգամ միջազգային մրցաշարերի մասնակցելիս Վահրամ Խուդոյանն իր առջև 2 նպատակ է դնում` զբաղվել սիրելի մարզաձևով ու Հայաստանի անունը մեկ անգամ ևս հնչեցնել համաշխարհային հարթակներում։
