ԵՐԵՎԱՆ, 6 մայիսի — Sputnik, Գոհար Սարգսյան. Ապրիլի 24-ին` հայերիս համար խորհրդանշական օրը, 64-ամյա Վահրամ Խուդոյանը Նոր Զելանդիայի Օքլենդ քաղաքում ոսկե մեդալ շահեց և ծածանեց եռագույնը: Հայկական օրհներգի ներքո աշխարհի գրեթե բոլոր երկրների պատվիրակությունների ներկայությամբ հայտարարվեց Հայաստան անունը: Այդ օրը մարզական աշխարհում ևս հիշատակվեց վերածննդի ու հաղթանակի գաղափարը, անկախ պատմական իրադարձություններից:
«Նոր Զելանդիա մեկնելիս ինձ համար երկու կարևոր նպատակ կար` զբաղվել իմ սիրած սպորտաձևով և Հայաստանի անունը բարձր պահել միջազգային հարթակում»,- Sputnik Արմենիային ասաց Վահրամ Խուդոյանը:
Հայ ծանրամարտիկը չեմպիոն է ճանաչվել 60-64 տարեկանների և 105 կգ-ից ավելի քաշայինների կարգում:
«Նոր Զելանդիայի ներկայացուցիչը չորրորդ տեղը գրավեց, ես հաղթեցի Ռուսաստանի ներկայացուցչին, որն ուժեղ էր, հաղթեցի նաև Շվեդիայի մարզիկին: Նրանք նման մրցումների մասնակցելու ավելի մեծ փորձ ունեին, լուրջ մարզիկներ էին: Ռուսաստանը ներկայացնող ծանրամարտիկը` Նիկոլայ Շանինը, օրինակ, աշխարհի ռեկորդակիր է»,-պատմեց Վահրամ Խուդոյանը:
«World Masters Games»-ի կամ ոչ պրոֆեսիոնալ մարզիկների օլիմպիական խաղերին մասնակցելու նպատակն իր առջև Խուդոյանը դրել է դեռևս նախորդ տարի ու սկսել էր ինտենսիվ մարզումները:
Հաղթանակն էլ կայացավ, չնայած քառասուն ժամ տևած ճանապարհին, հոգնածությանն ու կլիմայական հարմարվողականությանը:
Մրցումներին մասնակցում էին նաև հարևան Վրաստանից ու Ադրբեջանից, յուրաքանչյուրը՝ մեծ պատվիրակությամբ: Առավել մեծ էր Ռուսաստանի պատվիրակությունը` մոտ 600 հոգի: Հայաստանից մրցմանը ներկա էր միայն Վահրամ Խուդոյանը, այն էլ` ոչ թե պետական աջակցությամբ, այլ սեփական միջոցներով: Հայ ծանրամարտիկը հույս հայտնեց, որ իր հաղթանակը հող կնախապատրաստի, որպեսզի հետագա տարիներին մարզիկները պետական աջակցությամբ մեկնեն միջազգային մրցումների:
«Այնտեղ ներկա էր 28 սպորտաձև ներկայացնող քսանութ հազար մարդ՝ աշխարհի 140 երկրից: Հայաստանից ես միակն էի: Կցանկանայի, որ այլ մարզիկներ ևս լինեին ինձ հետ: Նոր Զելանդիայում ես ոչ միայն մրցել եմ, այլև օտերարկրացի մարզիկներին պատմել եմ Հայաստանի մասին»,- պատմեց Վարամ Խուդոյանը:
Այս պահին նրա ձեռքում է ոսկե մեդալը: Երբ նա վերադառնա Հայաստան, կշարունակի մարզումները, որովհետև այս հաղթանակից հետո այլ մրցումների հրավերներ անպայման կլինեն: Հայ ծանրամարտիկը գերխնդիր ունի. ուզում է հնարավորին չափ շատ մրցումների մասնակցել, որպեսզի ամեն անգամ բարձր պահի իր երկրի պատիվը:
