ԵՐԵՎԱՆ, 1 սեպտեմբերի — Sputnik. Եթե արևմտյան երկրները կատարեին իրենց այն պարտականությունները, որոնք ստանձնել էին վերջին 20 տարվա ընթացքում ԵԱՀԿ-ում ընդունված հռչակագրերի շրջանակում, ապա Ղարաբաղյան հակամարտությունը կլուծվեր։ Այս մասին ասել է Ռուսաստանի ԱԳՆ ղեկավար Սերգեյ Լավրովը` ելույթ ունենալով Մոսկվայի Միջազգային հարաբերությունների պետական ինստիտուտի (ՄԳԻՄՕ) ու Դիվանագիտական ակադեմիայի ուսանողների և պրոֆեսորադասախոսական կազմի առջև, հայտնում է ՌԴ ԱԳՆ մամուլի ծառայությունը։
Լավրովն ընդգծել է, որ Ռուսաստանը պատասխանատու երկիր է և հանձնառու՝ կատարելու բոլոր այն հռչակագրերը, որոնք վերջին քսան տարում ընդունվել են ԵԱՀԿ-ում և Ռուսաստան-ՆԱՏՕ խորհրդում:
«Այդ հռչակագրերը բովանդակում են կողմերի ցանկությունը՝ հավասար անվտանգության տարածք ձևավորելու Եվրատլանտիկայում և Եվրասիայում, ինչպես նաև հավաստիացում, որ մեզանից ոչ ոք իր անվտանգությունը չի ամրապնդելու մյուսների անվտանգությունը ոտնահարելու հաշվին»,- նշել է նա:
Դրա հետ մեկտեղ Լավրովն ափսոսանք է հայտնել, որ այդ հռչակագրերը «այդպես էլ մնացին թղթի վրա»:
«Դրանք իրավաբանորեն պարտադիր դարձնելու մեր բոլոր փորձերը մերժվել են արևմտյան մեր գործընկերների կողմից,- արձանագրել է նա:- Ես համոզված եմ, որ եթե հավասար անբաժանելի անվտանգությունը իրապես իրավաբանորեն պարտավորեցնող ձև ընդուներ, ապա շատ հակամարտություններ, որոնք այժմ պահպանվում են Եվրոպայում, վաղուց կարգավորված կլինեին»:
Լավրովի կարծիքով`դա վերաբերում է Լեռնային Ղարաբաղի և Մերձդնեստրի հակամարտություններին: «Իսկ ուկրաինական ճգնաժամն ընդհանրապես չէր լինի»,-հավելել է նա:
