Եթե դուք 20 տարեկան եք կամ վաղուց հատել եք 20-ի սահմանը, ապա հաստատ լսել եք հայտնի հարցը. «Ե՞րբ ես ամուսնանալու»։ Ընդ որում, կարևոր չէ` սիրահետող ունես, թե ոչ։
Իսկ եթե դուք արդեն 25 տարեկան եք և դեռ չեք ամուսնացել, հարցադրումը փոքր-ինչ այլ կերպ է հնչում. «Ե՞րբ ես ամուսնանալու, որ երեխա ունենաս»։
Եկեք դիտարկենք հայ աղջիկների համար փեսացու գտնելու ամենաարդիական միջոցները։
Համացանց
Սա ամենաժամանակակից միջոցն է։ Ծանոթությունների համար նախատեսված կայքերը կամ սոցիալական ցանցերը լավ տարբերակ են նրանց համար, ովքեր փեսացու գտնելու նպատակաուղղված փնտրտուքների մեջ են։ Իհարկե, չի բացառվում, որ այդ ճանապարհին կարող են հանդիպել քրեական հակումներ ունեցող ու ոչ ադեկվատ տղամարդիկ։ Այդուհանդերձ, այս միջոցը տարածված է, և Հայաստանում ու դրսում ապրող հայուհիներից շատերը համացանցի միջոցով են ծանոթանում ու շփվում տղամարդկանց հետ։ Ի վերջո, գալիս է երկար սպասված պահը, երբ… կարելի է ասել` բինգո, որովհետև իրադարձությունները զարգանում են ցանկալի հունով։
Տղամարդն ամուսնության առաջարկ է անում, և ստացվում է, որ դուք ձեր փեսացուին գտաք համացանցում։
Օգնության են հասնում հարազատները
Հայաստանում տարածված ավանդույթ է` հարազատները սկսում են փեսացու փնտրել իրենց չամուսնացած աղջկա համար։ Իհարկե, երիտասարդներն այս տարբերակն այսօր այնքան էլ չեն ողջունում և հաճախ հրաժարվում են այդ «պառավական» տարբերակից։ Սակայն պետք է ասել, որ շատ-շատերն ընտանիք են կազմում հենց հարազատների ջանքերի շնորհիվ։
Պարզապես պետք է պատրաստ լինել, որ փեսացուն կարող է լինել ԱՄՆ-ից, Եվրոպայից կամ, օրինակ, Ավստրալիայից։
Զվարճանքի կենտրոններ
Գործն ամուսնության հասցնելու ամենաժամանակակից մեթոդը, թերևս, զվարճանքի կենտրոններն են։ Կարևորն այն է, որ ի ցույց դնեք ձեր ամբողջ հմայքը` չմոռանալով համեստության մասին, այլապես փեսացու «որսալու» փորձերն անհաջողության կմատնվեն. Հմայքն ու գռեհկությունն անհամատեղելի են։
Մարզասրահ
Դեպքեր են լինում, երբ հայ աղջիկները փորձում են ծանոթություն հաստատել մարզասրահի մկանուտ տղամարդկանց կամ մարզչի հետ։ Ինչ խոսք, ռիսկային քայլ է, և հայտնի չէ` ինչ ավարտ կունենա։ Բայց մարզասրահ կամ լողավազան այցելելը հաստատ դրական կանդրադառնա ձեզ վրա. գեղեցիկ կազմվածքն ապագա ամուսնու հետ ծանոթանալու լավագույն գրավականն է։
Աշխատավայր
Չի բացառվում, որ համատեղ աշխատանքը նույնպես օգնի այս հարցում, և ղեկավարի կամ գործընկերոջ հետ երկարատև շփումը ի վերջո հանգեցնի նրան, որ խոսակցությունը պտտվի հարսանիքի շուրջ։
Կարևորը, որ օրերից մի օր տղամարդն ասի ձեզ. «Արի ամուսնանանք»։
