Լաուրա Սարգսյան, Sputnik.
Ժամանակակից երիտասարդների համար ամուսնանալու լավագույն տարիքն է` 25 տարեկան ու ավելի։ Ենթադրվում է, որ այդ տարիքում մարդն արդեն ձևավորված է որպես անձ։
«Մենք պետք է վերանանք տարիներով պարտադրված կարծրատիպերից. աղջիկը չպետք է ապագա ամուսնու մեջ հորը փնտրի, ու ամուսինը չպետք է աղջկանից տասը տարի մեծ լինի։ Փորձը ցույց է տալիս, որ այդպիսի ամուսնություններն ապահարզանով են ավարտվում», – Sputnik Արմենիայի թղթակցի հետ զրույցում ասաց Ավետյանը։
Ամուր ընտանիքի գլխավոր գրավականը, ինչպես ասում է հոգեբանը, գիտակցված ընտրությունն է, առանց կողմնակի ճնշման, ինչպես դա հաճախ լինում է մեր հասարակության մեջ։ Ավելի լավ է լինել միայնակ, բայց երջանիկ, քան ինչ-որ մեկի հետ` բայց դժբախտ։
Ամուսինների միջև տարիքային օպտիմալ տարբերությունը 5–7 տարին է։ Հակառակ դեպքում մեծանում է հավանականությունը, որ ամուսինները կարող եմ իրար չհասկանալ։ Սրանով են պայմանավորված հաճախակի ամուսնալուծությունները, պնդում է Ավետյանը։
Հստակ տեխնոլոգիաներ ու մեխանիզմներ` ինչպես ամուսնանալ, դեռ ոչ ոք չի հորինել։ Սրտին չես հրամայի։ Առանց զգացմունքների ցանկացած հաշվարկը ձախողման է դատապարտված։
Ինչպես ամուսնանալ. հինգ խորհուրդ
Հոգեբաններն ու խնամախոսները հորդորում են` երկրորդ կեսին գտնելու համար, առաջին հերթին, պետք է պատրաստ լինել ամուսնության։ Հաջորդը քայլը` գտնել մարդու, ում հետ քեզ հանգիստ ու ազատ կզգաս։ Ցանկացած ժամանակներում, ցանկացած հարաբերությունների հիմքում վստահությունն ու անկեղծությունն է։
Կարևոր է անկեղծ լինել այն մարդու հետ, ում հետ պատրաստվում ես կապել կյանքդ։ Դա է ամուր ընտանիքի գրավականը։ Հոգեբանները կարծում են, որ 10–ից 7 դեպքում ամուսնալուծության պատճառ է դառնում ոչ անկեղծ լինելը, ինչ-որ բան թաքցնելը։
«Անցել են այն ժամանակները, երբ կանանց պարտադրում էին ամուսնական կյանքում լինել համբերատար ու հեզ։ Հիմա ամեն ինչ այլ է։ Զույգերը պետք է միմյանց հետ խոսեն մինչ ամուսնանալը ու դրանից հետո։ Պետք է հաշվի առնեն բոլոր դրական ու բացասական կողմերը», – ասաց Ավետյանը։
Ինչպես ինքդ քեզ «դատապարտես» ամուսնության ձեռնարկում կարևոր կետ է համարվում նաև փոխադարձ ըմբռնումն ու այն գիտակցությունը, որ դա իսկապես քո կեսն է։
Իսկ իրականում
Հաջող ամուսնության գրավականն իսկական սերն է։ Եվ կարևոր չէ, քանի տարեկան է ընտրյալդ։ Դրա ապացույցը բազմաթիվ երիտասարդ ընտանիքներն են, որոնց միջև տարբերությունը 10–ից 50 տարի է։
ԱՄՆ նախագահ Դոնալդ Թրամփի ու նրա կին Մելանյա Թրամփի միջև տարբերությունը 24 տարի է։ Արդեն 14 տարի է ամուսնացած են Մայքլ Դուգլասն ու Քեթրին Զետա-Ջոնսը, որոնց տարիքային տարբերությունը քառորդ դար է։ Ալլա Պուգաչովան ամուսնուց` Մաքսիմ Գալկինից մեծ է 27 տարով։ Այսպիսի նախադեպերը շատ են, ու մի բան պարզ է. այս մարդիկ չեն ղեկավարվել ուրիշների կարծիքով, ստանդարտներով, այլ պարզապես սիրել են միմյանց ու երջանիկ են։
