ԵՐԵՎԱՆ, 4 օգոստոսի — Sputnik. Ի տարբերություն հայկական կոնյակի, որը վաղուց արդեն ընդունված ու ճանաչված բրենդ է, հայկական գինին նոր է հայտ ներկայացնում միջազգային շուկա դուրս գալու։ Մեծ շուկաներ գրավելու համար այն պետք է արտադրվի բարձր որակով և խաղողի հայկական ավանդական տեսակներից, Sputnik Արմենիայի հետ զրույցում ասել է գյուղնախարար Իգնատի Առաքելյանը։
Գյուղնախարարությունում ծրագրեր են մշակում նաև ավանդական տեսակներ արտադրող գյուղացիներին պետական աջակցություն տրամադրելու և նրանց արտադրությունը խթանելու համար։
Միաժամանակ, գյուղնախարարությունում ծրագրում են առաջնային կիրառման գյուղտեխնիկան ևս գյուղացիներին լիզինգային տարբերակով տրամադրել։ Նախարարի խոսքով՝ ծրագրում կներառվեն չիր պատրաստող սարքեր, սերմազտիչ, կիթի սարքավորումներ։
«Գյուղատնտեսության մեջ այսօր այդ առաջնային վերամշակման սարքավորումներն արդեն հնացած են։ Մարդիկ դեռ աշխատում են հին տեխնոլոգիաներով, որոնք թույլ չեն տալիս բարձրարժեք արդյունք ստանալ»,– ասաց Իգնատի Առաքելյանը։
Նոր տեխնոլոգիաների շարքում է նաև կառավարության առաջարկած կաթիլային ոռոգման համակարգը։ Այն ներդնելու համար, սակայն, գյուղացուն դարձյալ լրացուցիչ ֆինանսներ են պետք։ Գյուղնախարարությունը չի թաքցնում` տեղյակ է, որ գյուղացին այս համակարգին անցնելու լրացուցիչ գումար չունի։
«Գյուղացին նեղվում է, ասում է` ես վարկերի մեջ եմ, դուք ինձ ասում եք` նորից վարկ վերցրու կաթիլային համակարգի համար։ Ով կարող է վերցնել, թող վերցնի՝ ներդնի։ Չի կարող միշտ վատ լինել, բերքը լավ կլինի, գինը կբարձրանա, մթերողները կընդառաջեն»,- ասաց նախարարը։
Նախարարը լավատես է. գյուղատնտեսությունը մի օր կկարողանա դուրս գալ այսօրվա փոսից։ Դրա համար նախարարությունը հատուկ վերապատրաստման ծրագրեր է նախատեսում գյուղոլորտի աշխատակիցների համար։ Իգնատի Առաքելյանը նշում է, որ գյուղացուն սովորեցնելու են անգամ հաշվարկել սեփական վարկունակությունը` վարկ վերցնելուց առաջ իր կարողությունները ճիշտ գնահատելու համար։
