ԵՐԵՎԱՆ, 4 օգոստոսի — Sputnik. Կառավարությունը փորձում է դիվերսիֆիկացնել արտահանման ուղղությունները, բայց արտահանման 90%–ը շարունակում է բաժին ընկնել Ռուսաստանին։
Որոշ չափով արտահանումներ են իրականացվում նաև նախկին ԽՍՀՄ երկրներից Ուկրաինա, Բելառուս, Ղազախստան, Բալթյան երկներ։ Այդուհանդերձ, գյուղնախարարը միայն ռուսական շուկայի վրա կենտրոնանալը սխալ է համարում և կողմնակից է արտահանման շուկաների դիվերսիֆիկացման։
«Իհարկե, Ռուսաստանում և ԵԱՏՄ–ում մեր արտադրանքը ճանաչում են որպես որակյալ, համեղ ապրանք։ Բայց, երբ նայում ենք այդ շուկաների ներմուծման ծավալները, պարզ է դառնում, որ հայկական արտադրանքի համար դեռ շուկա մտնելու մեծ պոտենցիալ կա»,– ասաց նախարարը` հավելելով, որ միակ խնդիրը հայ արտահանողների պրոֆեսիոնալ հատկանիշներ են։
«Մատների վրա կարելի է հաշվել այն արտադրողներին, որոնք կարող են բանակցել, իրենց մարքեթինգային կապերով, ներկայացուցչական ցանցերով կարող են սեփական արտադրանքը վաճառել։ Հիմնականում, մեկանգամյա, երկուանգամյա արտահանումներով են առաջ գնում»,– ասաց նախարարը։
Փոխարենը, Հայաստանը, Իգնատի Առաքելյանի համոզմամբ, կարող է արտադրական հարթակ դառնալ, որտեղ արտադրված ապրանքը կիրացվի ԵԱՏՄ շուկայում։ Ընդ որում, այս դեպքում խոսքը պանրի, տոմատի մածուկի արտադրության, անասնապահության մասին է։
Բայց այս ծրագրերն, ըստ նախարարի, առայժմ միայն քննարկման փուլում են։
«Բոլորին հետաքրքիր է Հայաստանում արտադրություն կազմակերպել այն պայմանով, որ դա հետո կարելի է արտահանել Ռուսաստան, Բելառուս կամ Ղազախստան»,– ասաց նախարարը` նշելով, որ ԵԱՏՄ երկրների շուկա արտահանելն, իհարկե, ավելի հեշտ է, բայց Հայաստանը պետք է նաև նոր շուկաներ փնտրի։
Անասնապահության ոլորտում, Իգնատի Առաքելյանի համոզմամբ, Հայաստանը արտահանման մեծ պոտենցիալ ունի դեպի արաբական երկրներ, բայց պահանջարկը մեծ է, իսկ անհրաժեշտ ծավալներ Հայաստանի անասնապահությունը չունի։
«Մենք վերջերս հանդիպումներ ենք ունեցել, և՛ Արաբական էմիրություններից, և՛ Իրանից շատ գործարարներ ցանկություն են հայտնել զարգացնել ոչխարաբուծությունը և արտահանել իրենց երկրներ»,– ասաց գյուղնախարարը։
Կառավարությունն առաջարկած ծրագրերին նախնական համաձայնություն տվել է և սպասում է որոշակի հստակեցման` ներդրումների իրականացման համար։
Իսկ օրգանական գյուղատնտեսության ոլորտում Հայաստանի արտահանման ուղղություն կարող են լինել ԱՄՆ–ը և ԵՄ–ն, բայց այս շուկայում Հայաստանը դեռ ճանաչելի չէ։ Այստեղ պետք է մեծ գումարներ ծախսել նաև հայկական արտադրանքը ճանաչելի դարձնելու համար։
href="https://armeniasputnik.am/…/armenia-gyux-naxarar-video-sput…">
