ԵՐԵՎԱՆ, 4 հուլիսի — Sputnik, Դիանա Հարությունյան. Արցախը անցումային փուլի նախագահ է ընտրելու երկու շաբաթից. ընտրելու են հենց խորհրդարանում մեծամասնություն կազմող խմբակցությունները:
Լրագրողներին միանշանակ պատասխաններ են տրվում՝ նա ամենալավն է, լավագույնն է, անփոխարինելին:
Մինչ այդ, Արցախում ներքաղաքական անցում է սպասվում, անցնցում, սահուն. սա լինելու է նախագահություն երեք տարի ժամկետով,անցումային շրջանի, հետո ինչ կլինի՝ դժվար է ասել:
Արցախի նախագահի աշխատակազմի ղեկավարի տեղակալ Դավիթ Բաբայանի խոսքով` Բակո Սահակյանի առաջադրումը, որպես անցումային փուլի նախագահ, չի հակասում ոչ հին, ոչ նոր Սահմանադրությանը: Բակո Սահակյանը երկու ժամկետ արդեն պաշտոնավարել է, ևս երեք տարի՝որպես անցումային փուլի նախագահ կաշխատի: Ի՞նչ կլինի 2020-ին, երբ նախագահին էլի համաժողովրդական ընտրությամբ կընտրեն: Բակո Սահակյանի առաջադրումը՝ երեք տարի անց, Դավիթ Բաբայանը հիմա չի բացառում, բայց նաև չի հաստատում.
Հիմա որևէ բան դժվար է ասել: Ինչ կլինի երեք տարի հետո, ցանկություն կունենա նախագահ Սահակյանը էլի պաշտոնավարել, չի ունենա, ինչպես կզարգանան իրադարձությունները: Հաստատ է, որ ամեն բան կլինի ըստ գործող Սահմանադրության, ասում է Դավիթ Բաբայանը:
Այսպես Արցախում էլի էր եղել՝ 95-ին, պատերազմից հետո: Դարձյալ անցումային փուլի նախագահ էր ընտրել Ազգային Ժողովը, հետո, սովորականի պես, տեղի ունեցան համաժողովրդական ընտրություններ:
2018-ից հետո Հայաստանում ամենակարևորը վարչապետի պաշտոնն է լինելու: Կառավարության նախորդ նիստում վարչապետին ու կառավարությանը վստահության քվե տվեց նախագահ Սերժ Սարգսյանը: Հետո ով կլինի վարչապետը 2018-ին հարցին հենց այդ վստահության քվեն հղում արեց: Դա, ըստ շատ վերլուծաբանների, խոսում է այն մասին, որ առայժմ նախագահին վարչապետի կամ նախագահի պաշտոնում չենք տեսնի: Ինչ-որ կլինի՝ կլինի հետո: Քաղաքագետ Ստեփան Սաֆարյանը քչերից է, որ արդեն հաստակ կանխատեսում է։
Իսկ Բակո Սահակյանը դեռևս պաշտոնապես չի հաստատել իր թեկնածությունը որպես անցումային փուլի նախագահ: Ինչպես ասում են՝ ամենահետաքրքիրը՝ վերջում, թեև հիմա էլ կասկած չկա: Պարզ է, որ նա այլընտրանք չի ունենա, ունենալու դեպքում էլ արագ կհաղթի մրցակցին: Ընտրվելու դեպքում, ի դեպ, նա կղեկավարի նաև կառավարությունը:
Ապրում ենք մի տեսակ զուգահեռ իրականություններում ու Արցախում տեղի ունեցողի արտացոլումը, անկախ ամեն ինչից, Հայաստանում, բնականաբար, շատերին է հավանական թվում: Հայաստանի համար անցումային փուլն արդեն հիմա է,արժե արդյոք հիշեցնել՝ ով է նախագահը:
