ԵՐԵՎԱՆ, 22 հունիսի — Sputnik. Հայաստանի բրեյք դանսի ասոցիացիայի նախագահ, «TIME FOR KIDS» ամենամյա Հիփ հոփ մշակույթի և էքստրեմալ սպորտաձևերի միջազգային փառատոնի կազմակերպիչ Գարիկ Ալեքսանյանը Sputnik Արմենիա մուլտիմեդիոն կենտրոնում նշեց, որ փառատոնը յուրահատուկ է արտերկրից մեծ թվով մասնակիցների ներգրավմամբ։
«Մեկնարկելու ենք Պարույր Սևակի փողոցից, իսկ երկօրյա մրցումների եզրափակիչ փուլը տեղի կունենա Ազատության հրապարակում՝ հունիսի 25-ին»,- ասաց նա։
Փառատոնի կազմակերպիչներից Նարեկ Զոհրաբյանն էլ նշեց, որ կբացահայտվեն նոր արտիստներ, կկազմակերպվեն պարային և սպորտային դասընթացներ, հանդիսատեսը հնարավորություն կունենա անմիջական շփվել աշխարհահռչակ արտիստների հետ։
Եռօրյա աշխույժ ու հետաքրքիր միջոցառմանը ներկա է լինելու նաև «ALL THE MOST և BRING IT BACK» լեգենդար խմբերի ղեկավար Յան Դը Շրիմփը:
«Երրորդ անգամ եմ գալիս Հայաստան, հաճելի է համագործակցել տեղի խմբերի հետ, շատ ընկերներ ունեմ այստեղ, Հայաստանն այն երկիրն է, ուր միշտ ուզում ես վերադառնալ»,- ասաց Շրիմփը։
Աշխարհահռչակ «Flying Steps» խմբի ղեկավար, փառատոնի մրցավար Վարտան Բասսիլը Գերմանիայից տեսակապի միջոցով հայտնեց, որ ուրախ է, որ հայրենիքում է լինելու այդ օրերին։
Այդպիսով, վաղվանից երևանյան շոգն աննկատ կանցնի հիփ հոփի ռիթմի և էքստրիմ սպորտի հնարքների գայթակղության ներքո։