ԵՐԵՎԱՆ, 22 հունիսի — Sputnik. Ադրբեջանի ՊՆ–ն հերթական ապատեղեկատվությունն է տարածել՝ կապված խոցված հայկական ԱԹՍ–ի հետ, Sputnik Արմենիայի հետ զրույցում ասաց Արցախի հանրապետության նախագահի մամուլի քարտուղար Դավիթ Բաբայանը։
Ադրբեջանի ՊՆ–ն չորեքշաբթի հայտարարել էր Արցախի շփման գծում հայկական ԱԹՍ–ի ոչնչացման մասին։
«Այդ նորությունը հերթական խայծն ու ապատեղեկատվություն է։ Դա շատ նման է նրան, թե ինչպես երեկ Ադրբեջանում ներկայացրեցին այն խեղճ մարդուն, որը մոլորվել և հայտնվել էր Ադրբեջանի սահմանին։ Նրան ադրբեջանական զրահաբաճկոն էին հագցրել և ներկայացրել որպես աշխարհում ամենահայտնի կոմանդոս»,– ասաց Բաբայանը։
Ավելի վաղ ադրբեջանական ԶԼՄ-ները` հղում անելով Ադրբեջանի ՊՆ–ին, տարածել էին իբրև թե հայկական բանակի հետախուզադիվերսիոն խմբի անդամի լուսանկար ու տեսանյութ։
Ինչպես պարզել էր Sputnik Արմենիան, Զավեն Կարապետյան անունով անձը, որին ադրբեջանական կողմը ներկայացրել էր որպես «հայ դիվերսանտ», գրանցված է Վանաձորի ծերանոցում։ Բաբայանի խոսքով` խոցված ԱԹՍ–ի մասին ապատեղեկատվությունը նույն շարքից է։ Նա նշեց, որ Ադրբեջանի նման գործողությունները պետք է իրավական գնահատական ստանան ՄԱԿ–ի և այլ կառույցների կողմից, հատկապես այն կառույցների, որոնք զբաղվում են մարդու իրավունքների պաշտպանությամբ։
«Ադրբեջանի գործողությունները տվյալ դեպքում անմարդկային են»,– ընդգծեց Բաբայանը։
Տեսաձայնագրության վրա «դիվերսանտն» իր անունն է տալիս (Զավեն Կարապետյան) և նշում ծննդավայրը` ՀՀ Նոյեմբերյանի Դովեղ գյուղ։
ՀՀ ՊՆ մամուլի քարտուղար Արծրուն Հովհաննիսյանը, մեկնաբանելով գերեվարված հայ զինծառայողի մասին ադրբեջանական կողմի հայտարարությունը, ասաց, որ Ադրբեջանի ՊՆ–ն հերթական ապատեղեկատվությունն է տարածել։ Նրա խոսքով` հայկական ԶՈՒ–ն որևէ դիվերսիոն գործողությունների չի դիմել, զոհերի և գերի ընկած զինծառայողների մասին խոսակցություններն անհիմն են։
