ԵՐԵՎԱՆ, 21 հունիսի — Sputnik. Զավեն Հովհաննեսի Կարապետյան անունով անձը ծնվել է 1974թ-ին, Լոռու մարզում, մեծացել մանկատանը, իսկ ներկայում գրանցված է Վանաձորի տարեցների տանը։ Այս մասին Sputnik Արմենիային հայտնեցին այդ հաստատությունից։
Վանաձորի տարեցների տան մեր զրուցակիցը պատմեց, որ Զավեն Կարապետյանը թեև հաշվառված է իրենց մոտ, բայց երբեք այնտեղ չի բնակվել։
«Բնակության վայր չի ունեցել, տնակում է ապրել, այդ տնակը հանել են, մեր նախկին տնօրենն էլ նրան գրանցել է այստեղ, բայց ընդհանրապես ինքը մի գիշեր անգամ այստեղ չի գիշերել»,– ասաց նա` հավելելով, որ տեղեկություն չունի, թե տնակը հանելուց հետո որտեղ է ապրել Կարապետյանը։
Մեր զրուցակիցը նշեց, որ Զավեն Կարապետյանին ճանաչել է 1998 թ-ից, բայց շատ մանրամասներ նրա կյանքի մասին չգիտի։ Տեղյակ է միայն, որ նա մեծացել է մանկատանը, մտերիմ է եղել և շփվել է միայն մանկատան իր բախտակից ընկերների հետ։ «Մանկատան տղաներ էին։ 1990-ականներին Շառլ Ազնավուրը, որ եկավ Հայաստան, իրենց աջակցություն տվեց, տնակներ հատկացրեց, որ բնակվելու տեղ ունենան։ Դրանից հետո փայտամշակման արհեստանոցում էր աշխատում, բայց մոտը տարօրինակություններ նկատվեցին, այդ արհեստանոցից հանեցին»,– պատմեց տարեցների տան աշխատակիցը։
Նա նշեց, որ այսօր առավոտյան իրենց նաև ոստիկանությունից են զանգել, ճշտել Մայնեխի 8 հասցեում գրանցված Զավեն Կարապետյանի ինքնությունը։
Ի դեպ, մեր զրուցակցի խոսքով, ծերանոցը ևս նախկինում Շառլ Ազնավուրի հովանավորության ներքո էր, այդ է պատճառը, որ Կարապետյանը գրանցվել է հենց այդ հասցեում։
Ադրբեջանական ԶԼՄ–ների տարածած ինֆորմացիան, որ Զավեն Հովհաննեսի Կարապետյանը զինվորական է և Տավուշի մարզի Դովեղ գյուղի բնակիչ, իրականությանը չի համապատասխանում։
Հիշեցնենք, որ «ԱՊԱ» գործակալությունը տեղեկատվություն էր տարածել այն մասին, որ հունիսի 20-ին հայ-ադրբեջանական շփման գծում Հայաստանի Զինված ուժերի դիվերսիոն մի խմբավորում փորձել է անցնել Ադրբեջանի ԶՈւ պաշտպանական գիծը, սակայն, ըստ նրանց, ժամանակին ձեռնարկված միջոցառումների արդյունքում հայկական կողմը հետ է քաշվել՝ տալով կորուստներ, և հայկական կողմից կա գերի:Այնուհետև Ադրբեջանի ՊՆ-ն հոդված և դրան կից տեսանյութ է հրապարակել, որտեղ ներկայացրել է «հունիսի 20-ին ձերբակալված հայ դիվերսանտին», ով ներկայանում է որպես Զավեն Հովհաննեսի Կարապետյան (ծնված 1974 թ.):
