ԵՐԵՎԱՆ, 19 հունիսի — Sputnik. Հունահռոմեական ոճի ըմբիշ, Օլիմպիական խաղերի և Եվրոպական խաղերի փոխչեմպիոն Միհրան Հարությունյանը ոչ մի առնչություն չունի Մոսկվայում տեղի ունեցած ծեծկռտուքի և կրակոցի հետ: Այս մասին այսօր Sputnik Արմենիա մամուլի կենտրոնում լրագրողների հետ հանդիպման ժամանակ ասաց ՀՀ ըմբշամարտի ֆեդերացիայի մամուլի քարտուղար Կարեն Գիլոյանը:
«Ռուսական մամուլը գրեց, որ Մոսկվայում Միհրան Հարությունյանը կրակոցների մասնակից է եղել: Այդ տեղեկությունները հրապարակվելուց անմիջապես հետո ես, ֆեդերացիայի անդամները նույնպես կապ ենք հաստատել Միհրան Հարությունյանի հետ, և նա ասել է, որ ինքը դեպքի վայրում չի եղել: Որտեղ տեղի է ունեցել միջադեպը, այդ ավտոսպասարկման կետում կայանված է եղել նաև Միհրան Հարությունյանի մեքենան՝ վերանորոգման նպատակով: Միհրան Հարությունյանը ներկա չի եղել, տեղյակ չի եղել»,- շեշտեց Գիլոյանը:
Գիլոյանի խոսքով` Միհրանը նույնիսկ կատակեց. «Ինչու՞ ես ինձ զանգել, ես արդեն «ձերբակալված» եմ»։
Անդրադառնալով Միհրան Հարությունյանի մարզավիճակին՝ Գիլոյանն ասաց, որ նա շարունակում է ապաքինվել, ուսի վնասվածք ունի, որը ևս բուժման կարիք ունի:
Հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանն էլ իր հերթին նշեց, որ Միհրան Հարությունյանը բարձրակարգ ըմբիշ է։
«Եթե նա գտնվում է նորմալ մարզավիճակում, ապա կմասնակցի հետագա մրցաշարերին: Եթե վնասվածք ունի, որը խանգարում է, այդ դեպքում ոչ ոք իրավունք չունի ցանկացած անձի առողջության հետ խաղալու: Նա մեր հավաքականի լիարժեք անդամն է»,-ասաց Ջուլֆալակյանը: