ԵՐԵՎԱՆ, 21 սեպտեմբերի – Sputnik. Հայ ժողովուրդը համահայկական հանրաքվեի ժամանակ կողմ քվեարկեց Խորհրդային Միությունից անկախանալուն և վերականգնեց 1921 թվականին կորցրած անկախությունը։
1990 թվականի օգոստոսի 23–ին Հայաստանի Գերագույն խորհրդի ընդունած փաստաթղթով լուծարվեց Հայկական Խորհրդային Սոցիալիստական Հանրապետությունը և հռչակվեց անկախ Հայաստանի Հանրապետությունը։
Հռչակագրի տեքստը կարդաց պատգամավոր Արամ Մանուկյանը, որը հայտնի քաղաքական գործիչ, 1918–ից մինչև 1920 թվականը գոյատևած Առաջին Հանրապետության հիմնադիրներից մեկի անվանակիցն էր։
1991 թվականի մարտի 1-ին Հայաստանի Գերագույն Խորհուրդը որոշեց անցկացնել հանրաքվե՝ ԽՍՀՄ կազմից դուրս գալու մասին և համաժողովրդական քվեարկության դնել հետևյալ հարցը․ «Համաձա՞յն եք, որ Հայաստանի Հանրապետությունը լինի անկախ ժողովրդավարական պետություն ԽՍՀՄ-ի կազմից դուրս»։
Ընտրելու իրավունք ունեցող քաղաքացիների 94,99%–ը այդ հարցին դրական պատասխան տվեց։
Երկու օր անց Գերագույն խորհուրդը Հաայստանն անկախ ինքնավար պետություն հռչակեց։
1991 թվականի հոկտեմբերին Լևոն Տեր–Պետրոսյանն անկախ Հայաստանի առաջին նախագահ ընտրվեց։ Նույն տարում Հայաստանն ընդգրկվեց Անկախ պետությունների համագործակցության կազմում։ 1992 թվականին Հայաստանը դարձավ նաև ՄԱԿ–ի անդամ։ 2001 թվականից Հայաստանը Եվրոպական խորհրդի լիիրավ անդամ դարձավ։
Մինչև 2018 թվականը Հայաստանը նախագահական հանրապետություն է մնալու, սակայն գործող նախագահի լիազորությունների ավարտից հետո երկիրը կանցնի խորհրդարանական կառավարման կարգի։ Սահմանադրության մեջ համապատասխան ուղղումներն ընդունվեցին 2016 թվականի դեկտեմբերին։
Նոր Սահմանադրության համաձայն` խորհրդարանական առաջին ընտրություններն անցկացվեցին ապրիլի 2–ին։
